Tusagassiutitigut nalunaarut

Inatsisartut Siulittaasuat Jonathan Motzfeldt danskit Sydslesvigimi ukimoortumik ataatsimiinnerannit uteqqammerpoq. Ukioq manna ataatsimiinnermi "Nunat Avannarliit Killiit Naapippavut" qulequtarineqarpoq, Jonathan Motzfeldtilu oqalugiartunut pingaarnernut ilaavoq.

Jonathan Motzfeldtip ulloq 12. juni Flensborg-imi oqallinnermi Savalimmiuni Lagtingimi ilaasortaq Høgni Hoydal, Folketingimi aammalu Nunani Avannarlerni danskit sinnerlugit aallartitani ilaasortaq Jens Chr. Larsen kiisalu Sydslesvigsk Foreningimi siulittaasoq peqatigalugit una qulequtaralugu oqalliseqatigiipput:

"Kalaallit Nunaat, Savalimmiut Sydslesvigilu: Nunat Avannarliit ungasissortaat – danskit nunani avannarlerni ataatsimooqateqarneranni kulturikkut immikkuullarissuseqarneq".

Nunani Avannarlerni Killerni namminersornerullutik ingerlatsisut, tassa Kalaallit Nunaat Savalimmiullu, namminerisaminnik Nunat Avannarliit Siunnersuisoqatigiiffianni aallartitaqassanersut oqallinnermi annertuumik eqqartorneqarpoq. Inuit nunani avannarlermiut immikkooruteqaraluarlutik annertuumik nunani avannaamioqatigiinni naalakkersuinikkut kulturikkullu suleqatigiissinnaanerat nunat avannarliit ilisarnaatigilluinnarpaat. Nunani avannarlerni assigiinngissutsit Jonathan Motzfeldtip ilanngullugit erseqqissaatigai. Taamaalilluni Alaska Canadalu issittumi Kalaallit Nunaata pissusissamisoortumik suleqatigai, Sydslesvigillu nunanut avannarliit europallu qeqqanni inissisimasutut Danmarki nunani avannarlerni kujallersaasutut inissisimasoq pissusissamisoortumik pingaarnersaatillugu. Nunani avannarlerni suleqatigiinnerup immikkuullarissup nunani avannarlermiut – naak, immaqalu aamma, assigiingissutsit piugaluartut – oqaloqatigiissinnaanermikkut nunanilu avannarlerni suleqatigiissinnaanerat tunngaviulluartoq naggasiullugu isumaqatigiissutigineqarpoq.

"Sydslesvigimi ukiumoortumik ataatsimiinneq pissarsiffiulluarpoq. Naak nunani avannarlerni inuit ungasikkaluarluta ataatsimut uummateqarpugut. Assigiinngikkaluaqaluta Sydslesvigimi danskinut ikinnerussuteqartunut assigiissuteqaqaavut. Nunat avannarlliit amerlasuujugaluarlutik ataasiusut ukiumoortumik ataatsimiinnerup takuteqqippaa." Jonathan Motzfeldt oqarpoq.

Jonathan Motzfeldtilu Sydslesvig-ip kitaani Vestejderstedip atuarfiani ulloq 11. juni 2004 aammalu Flensborgimi det danske Centralbibliotekimi ulloq 12. juni nerersuaqatigiinnermi pingaarnertut oqalugiartuuvoq. Taakku saniatigut Mikkelbergimi Hatstedimiittumi ulloq 13. juni silami ataatsimiinnermi oqalugiarpoq.