Namminersorlutik oqartussat nersornaasiuttagaat sølviusoq atuarfiup pisortarisimasaanut Jarl Jensenimut Inatsisartut siulittaasuata Josef Motzfeldtip tunniuppaa. Nersornaasiineq Hans Egedep illuani ingerlanneqarpoq.

Jarl Jensen 1970-imi inuusuttuulluni Nuummut tikippoq, ilinniartitsisutut atorfinilluni. Illoqarfimmi ukiorpassuarni ilinniartitsisutut atuarfiullu pisortaatut sulereerluni avannaanut ingerlaqqippoq, ilinniartitsisutut atuarfiullu pisortaatut atuulluni. Tamatuma kingorna Jarl Jensen siullermik Ammassaliup Kommunerisimasaanut ingerlaqqippoq ilinniartitsisutut atuarfiullu pisortaatut sulilluni, tassanngaanniillu Ittoqqortoormiit Kommunerisimasaanut ingerlaqqilluni, 1996-imiit siullermik atuarfiup pisortaata tulliatut kingusinnerusukkullu atuarfiup pisortaatut atuuffigisamini.

Jarl Jensen 2006-imi soraarninngornermi kingorna Ittoqqortoormiit Kommuniaata atuarfeqarfiani nalinginnaasumik ilinniartitsisutut atorfeqalerpoq, Ittoqqortoormiillu Kommunalbestyrelsianut iserluni.

Ukiorpassuarni atuarfinni pisortaasimasoq ilinniartitsisuusimasorlu atuartunut aammalu illoqarfigisamini assigiinngitsorpassuartigut malunnaateqarsimasoq, Jarl Jensen nævnini siulersuisunilu allaallumi ilinniartitsisut peqatigiiffianni suliaqartarsimasoq Inatsisartut siulittaasuata Josef Motzfeldtip oqaaseqarnermini qujaniarfigaa.