Naalakkersuisut Siulittaasuata Hans Enoksenip ulloq 16. april 2004 Hans Egedip Illuani nalliuttorsiualaarnermi Nersornaammik guultiusumik tunineqarnerani Inatsisartut Siulittaasuata Jonathan Motzfeldtip oqalugiaata.

Namminersornerullutik Oqartussat nersornaasiuttagaasa akimanersaat Nersornaat guultiusoq qaqutiguinnaq tunniunneqartartoq tunniussinnaagakku nuannaarutigaara. Taamatut qaqutiguinnaq pisartumik nersorinninneq ilinnut, Naalakkersuisut Siullit-taasuannut, Hans Enoksen, nunarput inuilu pillugit soqutiginnillutit sivisuumik peqataalluarsimaninnik malunnartitsiniarneruvoq.

Ilinnut nersorinnissutissavut amerlaqaat, sorpassuartigullu soqutiginnillutit peqa-taarsimavutit. Piffissaq manna atorlugu taakku tamakkiisumik taaguiffigissan-ngilakka. Assigiinngitsutigulli nuannaartorinartumik maligassiuisutut nunatsinnut immikkut pingaaruteqarfigisatit taasaqarfigissavakka.

Naalakkersuinikkut inuiaqatigiinnullu inoqatinnullu tunngatillugu sulinerit naaq-qavinnut aalajaatsuunermik tunngaveqartuarsimavoq, inuillu qinigaattut sulinerit ilagiit sinniisaannut qinigaanikkut aallartippoq. Kingorna nunaqarfinnut aqutsisunut Sisimiunilu kommunalbestyrelsimut qinigaavutit, piffissallu ilaa borgmesteritut atuullutit.

Inuiaqatigiinni inissanut pingaarneruleriartuaartunut inissikkiartuaarsimavutit. Siuariarnitit innuttanit tatiginartutut isigineqarnissamut piginnaaneqarninnit, taakkulu ilumoorfiginerinit, aallaaveqartarsimapput.

1995-imi Inatsisartunut qinigaavutit, ataatsimiititalianilu assigiinngitsuni arlalinni siulittaasuullutit.
Aamma piffissami sivikitsumi KANUKOKA-mi siulittaasutut inissipputit, Naalakkersuisunullu ilanngukkavit qimattariaqarsimallugu.

Inuinnartut suliffinni niuertutut pikkorissutut sunniuteqarluartutullu ilisimaneqarputit, suleqatinnillu nuannarineqarluartuujuarsimallutit.

Inuuvutit “imaaliallaannarlugu aalassatitassaanngitsoq”, nunatsinnilu sumulluunniit pigaangavit innuttaasut tusarnaarnissaannut oqaloqatiginnissaannullu piffissaqarniartuartarlutit.

Naalakkersuisut Siulittaasuat Hans Enoksen, Nersornaat guultiusoq Namminersornerullutik Oqartussat sinnerlugit manna ilinnut tunniutiligara  Siulittaasoqarfiup taamatut ilinnut qujassuteqarneranut ersiutaali.

Qujanarsuaq pilluarillu.