![](/media/axoe2dko/20170526c-50-aar-lr-formand-24695.jpg?rxy=0.4999943413462951,0.6286375212325226&width=1300&height=600&v=1d9d51b17086640)
Landsrådit siulittaasuata innuttaasunit qinikkap siulliup qinerneqarneranit ukiut 50-inngornerata malunnartinneqarnera iluatsilluartoq
Ukiut 50-it matuma siorna Landsrådit namminneq akunnerminnit innuttaasut qinigaannik siulittaasussaminnik siullerpaamik qinersinerat sapaatip akunnerani kingullermi tallimanngornermi Inatsisartut malunnartippaat. Taamanikkut Erling Høegh qinerneqarpoq, immikkullu nalliuttorsiorneq nunatta naalakkersuinikkut ineriartorneranut annertuumik pingaarutilik Katuap inersuaaraani kaffillernermi nalliussineqarpoq.
Nalliuttorsiualaarnermut inuit untritillit missaat takkupput, qaaqqusanut ilaallutik Landsrådimut ilaasortaasimasut pingasut. Anders Andreassen, Hendrik Nielsen aamma Konrad Steenholdt, taamanikkut Landsrådimi oqaluttaasarsimasut Avgôraq Lynge Niels Henrik Lynge, Inatsisartut siulittaasoqarfiannut qaaqquneqarsimapput nalliuttorsiornerup malunnartinneqarneranut.
Inatsisartut siulittaasuata Lars-Emil Johansenip nalliuttorsiualaarneq ammarlugu oqaaseqarnermini Erling Høeghip siulittaasutut innuttaasut qinigaattut siullertut maligassiuisuusimanera erseqqissarpaa. Taamanikkut Kalallit Nunaata naalakkersuinikkut ineriartornera nutaajunerusoq tunngavilerneqarpoq, maanna ukiut 50-it qaangiunneranni isumalioqatigiissitamik nunatta tunngaviusumik inatsisissaanik siunnersuusiortussamik pilersitsinermik kingunilik.
Nalliuttorsiualaarnermi Nunatta Katersugaasiviata Allagaateqarfiatalu pisortaa Daniel Thorleifsen Ilisimatusarfimmilu inuiaqatigiilerinermik ilinniartoq Qarsoq Høegh-Dam qaaqqusatut oqaaseqarput. Daniel Thorleifsenip oqaaseqarnermini innuttaasut oqartussaaqataanerata ullumikkut killiffia eqqartorpaa, ilaatigullu marloqiusamik qinigaaffeqartarneq ataatsimiititaliallu sulineranni ikinnerussuteqartut peqataatinneqarnissaasa qulaarnaarneqarnissaa eqqarsaatigalugit ajornartorsiutaasinnaasut tikkuarlugit. Innuttaasut oqartussaaqataanerat nukittorsarniarlugu Daniel Thorleifsenip siunnersuutigaa ulloq 26. maj nunatsinni innuttaasut oqartussaaqataanerannut ulloritinneqalersinnaasoq, innuttaasut oqartussaaqataanerat pisortaqarfinniinnaanngitsoq qinikkallu akornanniinnaanngisoq, kisiannili aamma angerlarsimaffinni suliffeqarfinnilu ingerlaavartumik oqaluuserineqarlunilu oqallisigineqartaqqullugu. Qarsoq Høegh-Dam qaaqqusatut oqaaseqarnermini inuusuttut amerliartuinnartut ilinniakkamik aallartitsisalersimanerata pingaaruteqassusia erseqqissarpaa, tamannami innuttaasut oqartussaaqataanerata nukittorsarneqarneranut aqqutissat ilagimmassuk.
Katuami aaqqissuussineq sioqqullugu Inatsisartuni ataatsimiititaliat ataatsimiittarfiisa aqqi nutaat, Ataatsimiittarfik Erling Høegh aamma Ataatsimiittarfik Lars Chemnitz, Inatsisartut siulittaasuata uleerpai. Tamatumunnga atatillugu oqaaseqarnermini siulittaasup Erling Høegh issuarpaa ukiut nikinneranni 1968/69-imi ukiortaami oqaaseqarnermini oqarmat Kalaallit Nunaanni sulissaagut, peqatigitillugulu peqqissaartumik sulisoqarnissaanik Lars Chemnitzip eqqaasitsissutaa issuarlugu. Issuarneqartut tamarmik ullumikkut Inatsisartut ataatsimiititaliaanni naalakkersuinikkut sulinermut najoqqutassatut isigineqarput, tamatumunngalu ataatsimiititaliat ataatsimiittarfiisa aqqi nutaat ersiutaallutik, nunatta ataatsimut oqaluttuarisaaneranik eqqaasitsisut. Katuami nalliuttorsiualaarnermi Inatsisartut siulittaasuat Inatsisartunut tunissutitut Erling Høeghip ajaappiarisimasaanik Erling Høeghip qatanngutaata erneranit Niels Egede Høeghimit tunineqarpoq. Ajaappiaq qiperukkamik allagartaqarpoq, allassimasumik Landsrådsformand Erling Høegh 10.10.1967.
Landsrådimut ilaasortaasimasut peqatigalugit ullormik malunnartitsineq nunatsinni innuttaasut oqartussaaqataanerata tamatumalu nalitsinnut siunissamullu pingaaruteqassusianik qularnanngitsumik eqqaasitsisarumaarpoq.
Ulloq iluatsillugu taamatuttaaq nalliuttorsiornermut atatillugu naqitaaqqiamik saqqummersitsisoqarpoq, isiginnaagassiaq, assit oqalugiaatillu peqatigalugit, inatsisartut nittartagaanni ina.gl/oqaluttuarisaaneq nassaarineqarsinnaasumik.