Sofie Peterseni ukiuni kingullerni 25-ni Kalaallit Nunaanni Biskoppitut sivisuumik tunniusimalluni suliaqarsimanini pillugu kuultiusumik Nersornaaserneqarpoq.

Inatsisartut Siulittaasuat Sofie Petersenimut oqalugiaammini ilaatigut makkuninnga erseqqissaateqarpoq:

1987-imi aggustimi palasitut ivertinneqarputit. Taamanerniit ukiut 34-it ingerlareersimalerput. 1993-imi novembarip aallaqqaataani Kalaallit Nunaanni ilagiit namminerminnik Biskoppeqarfinngortinneqarput namminnerlu Biskoppeqalerlutik, 1995-milu maajip aallaqqaataani Kalaallit Nunaata Biskoppeqarfiani Biskoppitut ivertinneqarlutit.

Kalaallit Nunaanni ilagiit qitiusumik aqutsisoqarfiat 2010-mi Ilageeqarnermut Naalakkersuisoqarfimmit Biskoppimut tunniunneqarpoq.

Tamannalu tassaavoq Kalaallit Nunaanni ilagiit ukiuni kingulliunerusuni illit Biskoppitut atuuffigisanni ineriartornerisa oqaluttuassartaa naatsoq.

Taamaalillutit ukiuni 25-ni Biskoppiuninni ilageeqarnermut ukiunilu kingulliunerusuni kristumiuussutsip ineriartorneranut annertuumik sunneeqataasimavutit.

Ukiuni amerlasuuni atuuffinni suliarisimasatit pingaaruteqarsimaqisut unammillernartorpassuartigut assigiinngitsutigut aqqutinni siumorsimasakkut, ilaatigut ajoqersuinikkut unammillernartutigut ilageeqarnikkullu ingerlatsinermi unammillernartutigut qaffasissumik inissisimasutigut takuneqarsinnaapput, soorlu assersuutigalugu Kalaallit Nunaanni ilagiit naalagaaffeqatigiit iluanni inissisimanerminnik silarsuullu sinneranut attaveqaatiminnik nassaarniartariaqarsimasut.

Aammattaaq Kalaallit Nunaanni Naalakkersuisut taarseraattut atuuffigisimavatit, tamanna ukiut ingerlanerini piffissani ilagiit oqqumoorfigisaanni assumoorfigisaannilu, taamaattorli Kalaallit Nunaanni kristumiuussutsimut ilagiinnullu patajaatsumik naleqqersuisuujuarsimavutit.

Unammillernartorpassuaqartaraluartoq sullinneqarnissamik piumasaqartut naalagaaffimmeersuugaluaraangata, ilagiinneeraluaraangata, Namminersornerullutik- imaluunniit Namminersorlutik Oqartussaneeraluaraangata ilagiinni patajaallutit qitiusutut inissisimajuarsimavutit.

Ilagiinni Biskoppitut sulininni ulluinnarni suliassavit saniatigut kalaallit ilagiit ineriartorneranni alloriutinik pingaarutilinnik sulissutiginninnissat piffissaqarfigalugulu nukissaqarfigisarsimavat.

Taamaalillutit ukiorpassuarni suleqatigiissitami siulittaasooreerlutit 2000-imi Kalaallit Nunaat biibilip nutserneqarneranik maannamut atuuttumik tunivat.

Taamatuttaaq 2005-imi Naalagiarnermi Ileqqoreqqusanut Ataatsimiititaliamut Siulittaasutut Ataqqinartorsuarmit piginnaatitaaffilerneqarlutit Kalaallit Nunaanni oqaluffinni Ritualboginik- Alterboginillu nutaanik suliaqarnerit naammassivat.

Tussiutit Pillugit Ataatsimiititaliamut Siulittaasutut Kalaallit Nunaanni tussiutissaq nutaaq  ukiut arfineq pingasut ingerlaneranni suliarujussuaq 2008-mi naammassivat, taamatuttaaq Ataqqinartorsuarmit piginnaatitaaffilerneqarlutit.

Taamatullu Ilagiit Nunarsuaq Tamakkerlugu Ataatsimiititaliarsuannut (World Council of Churches, Central Committee) 2013-imiit ilaasortaasimavutit.

Ulloq 1. maj 2020-mi Biskoppitut ukiut 25-nngortorsiorlugit nalliuttorsiorputit.

Tjenestemandit pillugit inatsit malillugu Biskoppitut atuuffinnit ulloq 30. november 2020-mi tunuartussaasimavutit. 1996-imi Kunngikkormiut nersornaasiuttagaannik tunineqarlutit Ridder Af Dannebrogitut toqqagaasimavutit, 2001-imi Ridder af 1. Grad af Dannebrogitut toqqagaallutit, 2002-mi sølviusumik Nersornaasigaallutit kiisalu 2014-imi Kommandør af Dannebrogsordenitut toqqarneqarsimallutit.

Siulittaasoqarfik sinnerlugu

Vivian Motzfeldt

Inatsisartut Siulittaasuat