Inatsisartut Siulittaasoqarfiata Sisimiuni pisortaq Hanseeraq Enoksen sølviusumik Nersornaaserpaat piffissami sivisuumi nunatsinni aalisarnermik inuussutissarsiuteqarnerup ineriartortinneqarnerani tunniusimalluni nersortarialimmik suliaqarsimanera pissutigalugu.

Inatsisartut Siulittaasuata Lars-Emil Johansenip Hanseeraq Enoksenimut oqaaseqarnermini ilaatigut erseqqissarpaa:

Inatsisartut Siulittaasoqarfiata sølviusumik Nersornaaserpaatsit piffissami sivisuumi tunniusimallutit aalisarneq eqqarsaatigalugu nersortarialimmik suliaqarsimanerit aammalu aalisarnermik inuussutissarsiuteqarnermi inuusuttunut amerlasuunut maligassiuisuunerit pissutigalugit.

Hanseeraq Enoksenip sulinermigut takutissimavaa inuussutissarsiummi ulluinnarni annertuumik nunat tamalaat akornanni unammilleqatigiiffiusumi suliffeqarfimmik unammillersinnaasumik pilersitsisoqarlunilu ineriartortitsisoqarsinnaasoq.

Taamatut sulinerit taamaalillutillu aalisarnermik inuussutissarsiuteqarnermi maligassiuisuunerit Siulittaasoqarfimmit nersorniarneqarpoq.

Inuusuttortavut inuussutissarsiutini assigiinngitsuni maligassiuisussanik pisariaqartitsipput, taakkunanngalu aalisarnermik inuussutissarsiuteqarneq nunatsinni inuussutissarsiutit pingaarnersaraat, tassanilu inuusuttortavut inuussutissarsiuteqartissagutsigit maligassiuisussanik pisariaqartitsilluta.

Siulittaasoqarfik sinnerlugu

Lars-Emil Johansen

Inatsisartut Siulittaasuat