![](/media/1s4lkxq4/img_6355.jpg?rxy=0.501588042962751,0.550816435729852&width=1300&height=600&v=1d9d51c6d624e60)
Inatsisartut Siulittaasuata Kim Kielsenip Tunngaviup tunniunneqarnerani oqalugiaataa
Tunngaviup Inatsit tunngaviusussaq pillugu isumalioqatigiissitat isumaliutissiissutaata persuarsiornartumik tunniunneqarnerani Inatsisartut Siulittaasuata Kim Kielsenip oqalugiaataa
Asasakka Naalakkersuisut Siulittaasuat, Inatsisartunut ilaasortat qaaqqusallu ataqqinartut.
Isumaliutissiissutip matuma persuarsiornartumik Inatsisartunut tunniunneqarneranut Inatsisartut sinnerlugit tiguara.
Tulluartippara Kalaallit Nunatsinnut tunngaviusumik inatsisissamik siunnersuusiornissaq eqqarsaatigalugu inatsisartutigoortumik suliarineqarsimanera eqqaalaassallugu.
Namminersorluni Oqartussaanerup 2009-mi eqqunneqarneranit ukiut marluk qaangiutiinnartut Kalaallit Nunatsinnut inatsimmik tunngaviusussamik suliaqarnerup aallartinneqarnissaa kissaatigalugu aalajangiiffigisassatut siunnersuutinik marlunnik Inatsisartunut saqqummiussoqarpoq.
Taamaalilluni namminersorluni oqartussaanerup eqqunneqarnerata kinguninngua Kalaallit Nunatta namminiilivinnissaanut suliap ingerlateqqinneqarnissaa naalakkersuinikkut kissaatigineqalereerpoq.
2016-imi Kalaallit Nunatsinni inatsit tunngaviusussaq pillugu isumalioqatigiissitamik pilersitsinissaq pillugu nassuiaat saqqummiunneqarpoq, novembarillu ulluisa 18-ianni Inatsisartunut agguaanneqarluni arfininngornermilu novembarip ulluisa 19-ianni siullermeerneqareerluni novembarip ulluisa 21-ianni aappassaaneerneqarluni.
Tamatuma kingorna Inatsisartut aalajangerpaat Kalaallit Nunatta aqunneqarneranut aaqqissuussaaneranullu malittarisassanut tunngaviusussanut siunnersuusiornissaq siunertaralugu inatsit tunngaviusussaq pillugu isumalioqatigiissitamik Naalakkersuisut pilersitsissasut.
Inatsisartut aamma aalajangerpaat ataatsimiititaliaagallartumik Inatsit tunngaviusussaq pillugu isumalioqatigiissitap sulineranik malinnaasussamik pilersitsisoqassasoq.
Tamakku kingunerivaat ullumikkut maani 2023-imi apriilip ulluisa 28-anni inatsit tunngaviusussaq pillugu isumalioqatigiissitap inernerata Naalakkersuisunit persuarsiornartumik Inatsisartunut tunniunneqarneranut.
Oqaatigisariaqarpoq naalakkersuinikkut, aningaasaqarniarnikkut, inuttut atugarisatigut, kulturikkut innuttaaqataasutullu pisinnaatitaaffiit tunngaviusut isumalioqatigiissitap sulinerani qitiutinneqarnissaat naalakkersuinikkut kissaataasimammat. Soorlu aamma inatsimmik tunngaviusussamik suliaqarnermi kinguaassavut eqqarsaatigalugit innuttaasut ataasiakkaat inuiaqatigiinnut tamarmiusunut pinngortitamullu avatangiisigisatsinnut akisussaaffeqarnerata erseqqissarneqarnissaat kissaatigineqarsimasoq.
Maanna tassa siunnersuummik inatsit tunngaviusussaq pillugu isumalioqatigiissitami sulinermut kissaatinik naammassinninniartussamik tigusaqarpugut.
Maluginiagassaavoq isumaliutissiissummik suliaqarnermi inuusunnerusut annertuumik akuummata, isummaminnik annissuillutik allatigullu suliap naammassineqarnissaanut akisussaaffimmik tigusillutik soorlu ilaatigut isumalioqatigiissitap siulersorneqarnerani tamanna takuneqarsinnaasoq.
Oqallinneq inuiaqatigiinni minnerunngitsumik inuusuttut nangissavaat taakkuuppummi massakkut isumaliutissiissummik saqqummiussiffigineqartut ingerlariaqqinnissamilu suliassamik kivitsisussat.
Naggasiullugu maanna isumaliutissiissutip Inatsisartunut taamalu aamma innuttaasunut tunniunneqarneranut qujavunga, taamaalillutami tamatta periarfissinneqaratta isumaliutissiissutip imarisaasa sukumiinerusumik misissuataarnissaannut isummerfiginissaanullu.
Maanna alloriaqqinnissatsinnut sakkussat ilaqqipput, sakkussaqarlualerpugut.
Nunattalu siunissaa qamavoq
Pisussaaffeqanngilagulli uninngatiinnarnissaanut
Tamaat kivitseqataassuugut.
Nuna manna tummagarput inuiaat kalaallit pigaarput aqussallugu.
Qujanaq
![](/media/1s4lkxq4/img_6355.jpg?rxy=0.501588042962751,0.550816435729852&width=1300&height=600&v=1d9d51c6d624e60)
![](/media/cewlg3bv/img_6395.jpg?rxy=0.5031706940357923,0.2807741639557364&width=1300&height=600&v=1d9d51c68c6cd40)
![](/media/0hmei53q/img_6414.jpg?rxy=0.4904708085495106,0.42614769736753944&width=1300&height=600&v=1d9d51c60e60c30)