Inatsisartut Siulittaasuata kalaallit assammik arsarlutik nunanut allanut unammisartut  2018-imi Nuummi PANAM-imi pissartanngorniunnerni taama angusarissaartiginerannik nersualaartorujussuuai.

Siulittaasoq:

Nuummi PANAM-imi unammisaqattaarnerni kalaallit nunanut allanut unammisartuisa angusaat malinnaaffigalugit tupinnaannartumik nuannaarnarpoq.

Unammisaqattaarnerni angusat manna tikillugu innuttaasunit aatsaat taama nuannaarutaatigalutillu qiimmattarnartigipput. Nunanit tamalaaneersut maani nunami timersornerat taama kusanartigisumik aaqqissuussaq aamma nunami tamarmi innuttaasunik taama katersuutsitsigisoq qaqutiguinnaq takusarpavut, minnerunngitsumik Inussivimmi TV-kkullu isiginnaartunut aamma radiukkut naalaartunut. Pisoq nunanut allanut unammisartut angusaannik ataqatigiissitsilerpoq nuannaarutaallunilu.

Qiimmartarneq taama annertutigisoq innuttaasunik katersortitsisinnaasoq qaqutiguinnaq takusarparput, soorlu nunanut allanut unammisartortavut ajugaaniutivinnernut angummata.

Kalaallit nunanut allanut unammisartut unammisaqattaarnerni pitsaanerpaat sisamaraat aamma angusaq tamanna inuusuttut nuannaartoriumaaraat aammalu timersorneq peqqinnartutut aamma sunngiffimmi pissarsinartutut sammisassatut siunniukkumaaraat qularutiginngilara.

Inuusuttut, utoqqaat meeqqallu mikinerusut Inussivimmi unammisaqattaarnerni pigititsisuullutik isiginnaartuusut takusakka siunissami imminnut timersortartutut isigilerumaartut qularutiginngilara.

Nunatsinni PANAM2018-mik piviusunngortitsinermut tunuliaqutaasorpassuit suliniaqatigiiffiit suliffeqarfiillu aamma unammisaqattaarnerit iluatsinnissaannut minnerunngitsumik namminneq kajumissutsiminnik suleqataasorpassuit qujaffigerusuppakka.

Timersornermi annertuunik allanik pisunik aaqqissuussisuuniarluta nalunaarta pisullu tamakku ataatsimoorluta nukittussuserput peqatigiillutalu kivitsisinnaanerput upperalugu nukittorsartigit.   

Ikinngutinnersumik inuulluaqqusillunga

Hans Enoksen

Inatsisartut Siulittaasuat