Inatsisartunut sivisunerpaamik ilaasortaasimasoq, Inatsisartunut sapinngisamik piaartumik inissitsiterfiusumik ataatsimiigiaqqusinissamik qinnuteqarluni Kim Kielsenimit saaffiginnissummik ullumi tigusaqarpoq.

Inatsisartut qinigaarlaat 2018-imi marlunngornermi 15. maj kiisalu pingasunngornermi 16. maj inissitsiterfiusumik ataatsimiigiaqquneqarnissaat sivisunerpaamik ilaasortaasimasup aalajangiuppaa.

Inatsisartut ataatsimiinnerat pisarneq malillugu Hans Egedep illuani nal. 9.00 ullaakkorsioqatigiinnermik kingornalu Inatsisartunut ilaasortat Annaassisutta Oqaluffianut nal. 10.00 naalagiariartorlutik ingerlaaqatigiinnerannik aallarnerneqassaaq. Naalagiareernermi ilaasortat Inatsisartut illorsuannut ingerlaaqatigiissapput, tassani inissitsiterfiusumik ataatsimiinneq nal. 11.00 aallarnerneqassalluni.

Hans Enoksen
Inatsisartunut sivisunerpaamik ilaasortaasimasoq