Inatsisartunut Naalakkersuisunullu ilaasortaasimasoq Kaj Egede ulloq 11. december 2013 toqukkut qimaguppoq. Kaj Egede piffissami 1991 - 1995 Inatsisartunut ilaasortaavoq, piffissanilu marlunni Naalakkersuisunut ilaasortaasarluni, siullermik 1987-imiit 1991-imut Nunaqarfinnut, Isorliunerusunut Nunaateqarnermullu Naalakkersuisutut, kingullermillu piffissami 1991-imiit 1992-imut Aalisarnermut, Suliffissuaqarnermut Isorliunerusunullu Naalakkersuisutut. Kaj Egede taamatuttaaq 2005-imiilli Qaqortup Kommuniani, kingusinnerusukkullu Kommune Kujallermi, kommunalbestyrelsimut ilaasortaavoq.

 

Kaj Egede Kgl. Veterinær- & Landbohøjskolimi nunalerinermik ilinniagaqarpoq, tunniusimallunilu inuussutissarsiumminik ingerlatsisuulluni, minnerunngitsumik nunalerinerup iluani soqutigisaqarluni. Nunalerineq pillugu Siunnersuisoqatigiinnut piffissami 1993-imiit 2008-mut siulittaasuuvoq, taamaalillunilu tamanna aqqutigalugu Upernaviarsummi misileraaviup ineriartortinneqarneranut peqataasimalluni, savaateqarnerup inuussutissarsiutivittut ineriartortinneqarneranut annertusarneqarneranullu, kiisalu nunalerinermik inuussutissarsiuteqarnermut nammineq nerukkaatissiornerup annertusarneranut qitiusumik inissisimanermi saniatigut.

 

Kaj Egede aalisarnermut naalakkersuisutut taamatuttaaq malunniuteqarsimavoq, nalaanimi pisassiissutit tuniniarneqarsinnaasut eqqunneqarmata. Kaj Egede inuussutissarsiornermi suliniuterpassuarnut siuttuusarsimavoq, taamatullu aamma ingerlatseqatigiiffinni namminersornerullutik oqartussanit pigineqartuni arlalinni siulersuisunut ilaasortaasarsimalluni.

 

Kaj Egede aamma Islandimut akissarsiaqarani aallartitatut konsulitut atuukkaluarpoq.

 

Kaj Egede 62-inik ukioqarluni qimaguppoq. Nulia, meerai ilaqutaalu eqqarsaatitsinniipput.

 

Eqqaaneqarnera ataqqinartuuli.

 

Lars-Emil Johansen

Inatsisartut Siulittaasuat