![](/media/3msh4enw/20170607-orienteringsbesoeg-i-atammik-den-2-juni-002.jpg?rxy=0.49523533758375643,0.4664816663662678&width=1300&height=600&v=1d9d51b23e1bc90)
Ilaqutariinnermut Peqqissutsimullu Ataatsimiititaliap Atammik tikeraarpaa
Ulloq 2. juni 2017-imi nunaqarfimmut Atammimmut Qeqqata Kommunianiittumut Inatsisartut Ilaqutariinnermut Peqqissutsimullu Ataatsimiititaliaat paasisassarsiorluni tikeraarpoq.
UPA 2017-imi ullut ataatsimiiffiunngitsut ikittunnguit ilaat iluatsillugu Ilaqutariinnermut Peqqissutsimullu Ataatsimiititaliap inatsisisiornini unitsilaarlugu Atammimmut paasisassarsiorluni tikeraarpoq.
Meeqqanut tapersersuineq pillugu inatsisissatut siunnersuummik, inuit innarluutillit illersuisuat pillugu inatsisissatut siunnersuummik aalajangiiffigisassatullu siunnersuuterpassuarnik aammalu isumaginninnermut peqqissutsimullu tunngasunik siunnersuutinik assigiinngitsunik suliaqareerluni aammalu ataatsimiinnerpassuarnik ingerlatsereerluni siunnersuuterpassuit innuttaasunut sammisut innuttaasut ilaannut naapeqatigiissutiginissaannut ataatsimiititaliaq periarfissarsivoq.
Atammimmi nunaqarfiup peqqissaavia ataatsimiititaliap pulaarpaa qarasaasiakkullu nakorsiartitsisarfiup Pipaluup atorneqarnera takullugu. Nunaqarfimmiit Maniitsumut saaffiginninnermi periuserineqartartoq takutinneqarpoq.
Atornerluinerup annertuup 2000-imi paasineqartup kinguneri kingunerluutaalu nunaqarfimmi innuttaasut suli sunnertisimassutigisaraat tikeraarnermi ataatsimiititaliamut paasissutissiissutigineqarpoq.
Annertuumik atornerluinermi meeqqanik kinguaassiuutitigut atornerlunneqarsimasorpassuarnut oqartussat sukkasuumik ataavartumillu ikiorsiisimannginnerat ataatsimiititaliamit maluginiarneqarpoq.
Nunaqarfimmi aammalu illoqarfinni nunaqarfinnilu avannarpasinnerusuni hashimik imigassamillu annertuumik atornerluisoqartoq ataatsimiititaliamut ilisimatitsissutigineqarpoq. Qanigisaasut ilaqutaasullu amerlasuut atornerluinermik sunnertisimanerisa qaavatigut atornerluineq sumiginnaanerup annertusineranik kinguneqarpoq.
Inuuniarnikkut ajornartorsiutit atornerluinermillu ajornartorsiutit taakkulu tunuliaqutaat imaannaanngitsuusut ajornanngitsumillu aaqqiissutissaqanngitsut ataatsimiititaliamit ilisimaneqarpoq. Allannguisoqassappat pinaveersaartitsinermik katsorsaanermillu suliniutit ungasissumut isigisut ataavartullu pisariaqarput. Siusissukkut pinaveersaartitsinermik suliniutit ingerlaneqartariaqarput.
Atammammi inuttaasut ilaannik naapitsinissamut periarfissinneqarsinnaagami ataatsimiititaliap assut qujamasuutigaa. Ajornartorsiutitik aammalu suliniutigerusullugit siunnersuutigiumasatik aaqqiissutigerusutatillu pillugit nunatsinni innuttaasunik ataatsimeeqateqarnissamut saaffigineqarnissamullu Inatsisartunut ilaasortat soqutiginnittuaannarput.
Ajornartorsiutit amerlasuut kommunip susassaqarfigai kommunillu akisussaaffigineqarlutik, taamaakkaluartoq piffinni unammilligassat pissutsillu Inatsisartunut ilaasortanit ilisimasaqarfigineqarnissaat pingaaruteqarpoq. Nunatsinni inatsisinut tunngatillugu ajornartorsiutit Inatsisartunut ilaasortanit tamatigut soqutigineqartuaannarput, nunatsinnili pissutsit pitsaanerulernissaat nukittorsarneqarnissaallu eqqarsaatigalugu Naalakkersuisunik ataavartumik oqaloqateqarnissaq Inatsisartunit, ataatsimiititaliamit ilaasortanillu aamma soqutigineqarpoq, taamaattumik Inatsisartunut ataatsimiititalianullu ilaasortat ilisimasaasa annertusarneqarnissaat pingaaruteqarpoq. Ilisimasassat nunatsinni innuttaasunik oqaloqateqartuarnikkut nunatsinnilu angalaarnikkut annertusiartortinneqartartut.
Innuttaasut unammilligassaminnut ajornartorsiutiminnullu tunngatillugu oqartussat qisuariarnissaannik oqariartuutitik kissaatitillu aalajangiusimaannassagaat ataatsimut isigalugu ataatsimiititaliamit kaammattuutigineqarpoq.
Oqartussat qisuariaateqanngippata imaassinnaavoq tusagassiortut tamallu qisuariaateqarnerisigut akisussaasut eqiiallatsinneqarsinnaasut aaqqiissuteqarnialerlutillu.
Ilaqutariinnermut Peqqissutsimullu Ataatsimiititaliap angalanerani peqataasut tassaapput Inatsisartunut ilaasortat Mala Høy Kúko (A), Jess Svane (S), Kelly Berthelsen (IA), Debora Kleist (IA), Mimi Karlsen (IA) aamma Laura Tàunâjik (S).
Annertunerusumik paasisaqarusuttut Ilaqutariinnermut Peqqissutsimullu Ataatsimiititaliap siulittaasuata tullianut Mala Høy Kúkomut, mobil (00299) 55 16 14-imut attaveqarsinnaapput.