Landsrådimut, Inatsisartunut Naalakkersuisunullu ilaasortaasimasoq, aalisariutip naalagaa Hendrik Nielsen, Indalêraq, ulloq 4. september 2022-mi toqukkut qimaguppoq.

Indalêraq 1942-mi juunip ulluisa aallaqqaataanni Saarluni inuuvoq, Aappilattumi Alluitsup Paanilu qatanngutigiinni arfiniliusuni nukappiarartatuaalluni alliartorluni. Aalisariutit naalagassaattut ilinniarsimavoq ukiorpassuarnilu nunatta imartaani minnerunnitsumillu kujataani aalisarsimalluni. Piffissami 1969-imiit 1983-imut ukiorpassuarni KNAPK-p siulersuisuunerinut ilaasortaasimavoq.

Ukiuni 1973-imiit 1979-imut Landsrådinut ilaasortaavoq, tamatumalu kingorna 1979-imiit 1991-imut Inatsisartunut ilaasortaalluni.

Ukiuni 1983-imiit 1987-imut Nunaqarfinnut isorliunerusunullu Naalakkersuisuuvoq.

Naalakkersuinikkut kammalaatimi suleqatimilu akornanni qiimmassaasutut inuttut nuannaartuuvoq suleqatikkuminartuaannarlunilu. Qiimasaartuaannartuugami ilakkuminarlunilu naapittakkaminit attaveqarfigisartakkaminillu nuannarineqartaqaaq.

Indalêraq 1989-imi novembarip ulluisa 29-ianni sølviusumik Nersornaaserneqarpoq.

Nulia, qitornai ilaqutaalu qamannga pisumik misiginneqatigaakka.

Indalêqqap qatanngutai, nulia Dorthie kiisalu qitornai, erngutai ernutaqqiutaalu eqqarsaatitsinniitippagut.

Indalêqqap eqqaaneqarnera ataqqinartuuli,

Kim Kielsen
Inatsisartut Siulittaasuat