Avannaani piniartut atugaat qilalukkanik qernertanik qaqortanillu piniarsinnaanerat Aalisarnermut, Piniarnermut Nunalerinermullu Ataatsimiititaliap oqaluuseraa. Pineqartumi ataatsimiititaliap nammineq ilisimasani avannaanilu piniartunit ataatsimiititaliami ilaasortanut saaffiginnissutit tunngavigalugit  oqaluuserinninneq ingerlanneqarpoq. Silaannaap allanngoriartornerata ajornartorsiortitsineranik, piniarnissamut periarfissaqannginnermik aammalu piniartut atugaat aallaaviginagit pisassanik agguaassisoqartarneranik avannaani piniartut oqaluttuarput.

Avannaani  qilalukkani qernertanik qaqortanillu pisassanik sinneruttunik agguaaqqittoqarsinnaaneranut periarfissaqarnersoq misissuisoqarnissaanut ajornanngippallu immikkut pisassiisoqarnissaanik Naalakkersuisunit iliuuseqarfigineqassasoq aammalu  KNAPK kattuffiullu immikkoortortaqarfii suleqatigineqassasut ataatsimiititaliamit kaammattuutigineqassaaq.

Taamatuttaaq qernertanik qaqortanillu aqutseriaatsip eqaannerunissaa tunngavissallu allanngorneranni pilertornerusumik qisuariartoqartarnissaanut nunatsinni nunanilu tamalaani periarfissanik Naalakkersuisut ujaaseqqullugit ataatsimiititaliamit kaammattorneqarput.

Avannaani piniartut atugaat ilungersunarput Naalakkersuisullu kinguarsaassanngitsut sukkasuumillu aaqqiissuteqarnissamut sulissuteqassasut ataatsimiititaliamit kaammattuutigineqassaaq.

Henrik Fleischer

Siulittaasoq

Annertunerusumik paasisaqarnissamut siulittaasoq uunga attavigineqarsinnaavoq mobil +299 52 72 82