All. Inatsisartut Siulittaasuat Mimi Karlsen

 

 

Ulluni makkunani aalisarnermut inatsisissamut nutaamut siunnersuutip tamanut tusarniaatigineqarnerani nittartakkani inuit attaveqaqatigiittarfiini isiginnaagassiamik siammarterisoqarpoq, tassani takuneqarsinnaalluni inatsisissatut siunnersuut ikuallanneqartoq, oqaaseqaataasartunilu siunnersuut siunnersuusiornermullu peqataasimasut nakkarsarneqarlutillu asissorneqarlutik.

 

Nunani allani erfalasunik upperisarsioqatigiillu allat atuagarsuinik iluartuutitanik ikuallaasarnerit takusareerpavut. Maannalu tassa nunatsinni inuit ilaat taamaaliornissaminnut isumassinneqarsimagunavipput. Tamanna alianartutut immaqalu annilaarnarsinnaasutut nammineq isumaqarfigivara.

 

Tamat oqartussaaqataanerat ilaasa akiuuffittut isigisarpaat, tamatumani inuiaqatigiinni immikkoortut ataasiakkaat assigiinngitsunik isumallit soqutigisallillu akunnerminni aalajangiiffigisassallu pillugit pissaaneqarniuttarlutik. Tamanna inerteqqutaanngilaq. Uloriarnartuali uaniippoq tamatumani inuit imminnut illuatungeriittut, aap allaat akeqqatut, taamaattussaannartullu isigilersinnaasarmata.

 

Tamat oqartussaaqataanerat aamma peqatigiinnertut isigisinnaavarput: Peqatigiinneq sunniuteqarnissamut tusaaniarneqarnissamullu tamatta periarfissaqarfigisarput. Tamat oqartussaaqataanerat uanga taamatut isigerusunneruvara.

 

Nunatsinni tamatta periarfissaqarpugut nunaqarfinni aqutsisunut, kommunalbestyrelsinut inatsisiliortartutsinnullu Inatsisartunut qinersinernut peqataanissatsinnut. Inatsisissatut siunnersuutit Inatsisartunut saqqummiunneqartussat tusarniaatigineqartarput tamatumanilu nunatsinni soqutigisaqaqatigiiffiit innuttaasullu kikkulluunniit tusarniaanermi akissuteqarnissaminnut periarfissaqartarlutik. Tamatta killiligaanata oqaaseqarsinnaatitaavugut, isummavut kissaatigisavullu naqisimaneqarata ersersissinnaallugit tunngavilersorsinnaallugillu.

 

Killiligaanatali naqisimaneqarata oqaaseqarsinnaatitaanerput tamanna qanoq atorneripput apeqqutaavoq, oqallinnermut qanoq peqataanerput apeqqutaavoq. Inerititarfiusumik oqallinnermi isummersoqatigiittoqartarpoq tunngavilersuisoqartarlunilu. Imminut tusarnaartoqartarpoq – apeqqutit paasisaqarfigineruniarlugit immaqalu paaseqatigiinnerunissaq anguniarlugu. Taamaaliornikkut peqatigiinneq nukittorsarneqartarpoq.

 

Nittartakkatigut inuit attaveqaqatigiittarfiisigut tamat oqartussaaqataanerat eqqarsaatigalugu nutaamik oqallittarfeqalersimavugut. Ajunngitsortai ajortortaalu tamaasa ilanngullugit. Nittartakkatigut inuit attaveqaqatigiittarfiisigut inuppassuit anguneqarsinnaapput. Nunatsinni sumiikkaluaruttaluunniit oqaloqatigiissinnaavugut eqqarsaatitsinnik, isummatsinnik ilisimasatsinnillu paarlaasseqatigiilluta.

 

Ajoraluartumilli aamma takusinnaaleriartorparput nittartakkatigut inuit attaveqaqatigiittarfiini oqalliseriaaseq peqqinnanngitsoq minittornertut siammariartuaarusaartoq. Allanik nakkarsaalluni oqalliseriaaseq. Imminut oqaloqatigiigani nilliaffiusoq. Akeqqersimaarluni oqalliseriaaseq peqatigiinnermik sanngiillisaasoq.

 

Allanik ataqqinninnermik takutitsisinnaaneq; ilakkuminartuuneq soqutigittartuunerlu kulturitta ilisarnaataasa ilagilluinnaraluarpaat. Allanut kusanaatsuliunngikkaluarluta isummavut kissaativullu ersersillugillu oqallisigisarsinnaasimagaluarpavut. Tamanna annaalernerparput?

 

Inneq ikualanerusinnaavoq uumassutaasoq, taarsiornermi qaammaqqutaasoq kialaartitsisorlu. Sakkutulli aamma atorsinnaavarput; piuneerutsitsinermut, aserorterinermut, suujunnaarsitsinermut… Nittartakkatigut inuit akornanni attaveqatigiittarfinnut taakkunanngalu atueriaatsitsinnut tamanna immaqa aamma atuuttutut oqaatigineqarsinnaavoq.

 

Allanik saassussinngikkaluarluni pingaartitanik sorsuutiginnittoqarsinnaanera eqqaamassavarput, nunamilu maani tusaaneqarniarutta nilliasariaqannginnerput nuannaarutigalugu.