Inatsisartut ukiakkut ataatsimiinnerat (UKA 2018) tallimanngornermi ulloq 28. september, nal. 11.00 aallartissaaq, pilersaarutillu malillugit ulloq 29. november 2018 naammassinissaa naatsorsuutigineqarluni.

 

Inatsisartunut ilaasortanit immikkoortut katillugit 69-t Naalakkersuisunillu immikkoortut 40-t oqaluuserisassanut ilanngunneqarput.

 

Sapaatit akunnerini ullut ataatsimiiffiusartussat ima agguataarneqarput:

 

• Ukiakkut ataatsimiinneq tallimanngorneq ulloq 28. september, nal. 11.00 aallartissaaq

 

• Ataasinngornerni, marlunngornerni pingasunngornernilu Inatsisartuni nal. 11.00-imiit 15.00-imut ataatsimiittoqartassaaq

 

• Sisamanngornerni Inatsisartuni nal. 11.00-imiit 16.00-imut ataatsimiittoqartassaaq

 

• Tallimanngornerit Inatsisartuni ataatsimiiffiusassanngillat, ulloq 5. oktober Inatsisartuni nal. 11.00-imiit 15.00-imut ataatsimiiffiusussaq eqqaassanngikkaanni.

 

• Tamatuma saniatigut pingasunngornerit tamaasa piffissami nal. 11.00-imiit nal. 12.00-imut naalakkersuisunut akunneq apeqquteqarfiusinnaasoq ingerlanneqartassaaq, tamannalu pereeraangat Inatsisartut ataatsimiinnerat nal. 15.00 tungaanut ingerlaqqittassassalluni. Akunneq apeqquteqarfiusinnaasoq siulleq ulloq 3. oktober ingerlanneqassaaq. Naalakkersuisut apeqquteqarfigineqarsinnaasut tulleriinnerat Inatsisartut nittartagaanni takuneqarsinnaassaaq.

 

 

 

UKA2018-imut atatillugu atortussat tamarmik www.inatsisartut.glimi takuneqarsinnaapput. Iluarsiissutit tamarmik nittartakkami ingerlaavartumik iluarsineqartassapput, taamaattorli suli periarfissaqarpoq atortussat tamaasa qarasaasiakkut tigusarusullugit nalunaarnissamut. Tamanna pillugu Laila Kristiansen lkri@inatsisartut.gl attaveqarfigineqarsinnaavoq.

 

 

 

Ikinngutinnersumik inuulluaqqusillunga

 

Hans Enoksen

Inatsisartut Siulittaasuat