Samling
UPA 2006/59.1
10. maj 2006
Agathe Fontain
Ulloq unnuarlu paaqqinnittarfiit Namminersornerullutik Oqartussat paaqqinnittarfiutaannut naligiissinneqarnissaannik Inatisisartut aalajangiiffigisassaattut siunnersuut, taamaalillutik kommunit aammattaaq aningaasartuutimik 50 procentiinik matussusiivigineqartalerlutik, kommunit meeqqanik inuusuttuaqqanillu paaqqinnittarfinni namminersortuni inissiigaangata.
(Inatsisartunut ilaasortaq Palle Christiansen, Demokraatit)
Meeqqat inuusuttuaqqallu ulloq unnuarlu inissinneqartariaqalersartut akiliunneqartarneri assigiingitsunit pinasuniit isumagineqarsinnaapput. Siullermik angajoqqaat pisussaatitaapput akileeqataanissaminnut, aningaasaqarneratali inissisimanrat apeqqutaasarluni. Inuit Ataqatigiinniit maluginiartarparput, angajoqqaat ulloq unuarlu angerlarsimaffimmut meeqqaminnik inissiisoqarsimanera pillugu akiliisinneqartartut amerlasuujunngitsut. Naatsorsuutigissavarpullu, akiliuteqaqqusaasarnermut piumasaqaatinut naammassinninngissimaneri peqqutaalluni, ikittuinnaat akiliisarsimassasut.
Tamassumali ersarinnerusumik paasisaqarfiginissaa ataatsimiititaliamut paasissutigitissallugu soqutiginaateqartutut isigaarput.
Ullumikkut kommuninut bloktilskud-nik isumaqatigiinniarnermi, Namminersornerullutik oqartussaniit ulloq unnuarlu angerlarsimaffinnut akiliutigisartagaat iluaniitinneqartarput, taamaattumik oqartoqarsinnaanngilaq toqqaannartumik Namminersornerullutik Oqartussat, akiliuteqartartut.
Siunnersuuteqartup Inatsisartuni ilaasortap Palle Christiansen-p siunnersuutaa Inuit Ataqatigiiniit soqutiginartipparput, isumaqaratta ulloq unnuarlu angerlarsimaffiit namminersortut soqutiginartuusut, ersarissunik maleruagassanik, soorlu pitsaassutsimik, perorsaariaatsimilluuniit piumaqasaqaataasinnaapput malittarisassaqartikkaanni.
Inuit Ataqatigiinnili isumaqarpugut, ullumikkut aningaasaliissuteqartarneq, Nam. oqartussat KANUKOKA-llu akornanni periuserineqartoq, qanorpiaq ittuussanersoq eqqartorluaqqaagassaasoq.
Naalakkersuisummi akissutaanni paasinarmat tamanna pisariaqartoq.
Taammaatumik siunnersuut taamatut isikoqartillugu akueriinnaraanni, kommuninut pitsaannginnerusumik kinguneqartussaasutut ernumanartoqartipparput.
Eqqarsaatigeqqissaarlugulu ataatsimiititaliami suliarineqaqqullugu, kommuninut aaqqissuusseqqinnisap isumaliuutissiissutaani pineqartup siunersuutigineqarnera ilanngullugu.
Taamatut isikkoqarluni itigartinneqarnissaa innersuussutigaarput aappassaaneerneqartinnanili Ilaqutariinnermut ataatsimiissiitaliami eqqartoqqaarneqaqqullugu.