Samling
13. juni 2006
FM 2006/Pkt. 73
Qeqertarsuaq, Aasiaat, Qasigiannguit, Ilulissat, Uummannap Upernaviullu Kommuniini aalisartut piniartullu umiatsiaararsortut, umiatsiaarartaarniarnerminni pisortanit tapiiffigineqarsinnaalernissaat siunertaralugu Naalakkersuisut peqquneqarnissaannik Inatsisartut aalajangiiffigisassaattut siunnersuut.
(Inatsisartunut ilaasortaq Ane Hansen, Inuit Ataqatigiit)
Siullermeerneqarnera
IA sinnerlugu inatsisartunut ilaasortap Ane Hansenip siunnersuutaa Demokraatinit tapersersunngilarput.
Demokraatit isumaqarput umiatsiaararsorluni piniarnermik aalisarnermillu sammisallit qanoq amerlatigissanersut qimerluussallugu piffissanngortoq. Aaqqissuussinikkut tulluussaanissamut piffissanngorpoq, taamaalilluni uumassusilinnik piujuaannartitsinissamik tunngavimmut piniartut aalisartullu amerlassusii tulluussarneqarlutik. Maannakkorpiaq aalisakkanik, miluumasunik imarmiunik timmissanillu pisassiisarneq pillugu oqallittoqaqaaq, taamaattumik umiatsiaararsorluni piniarnermik inuussutissarsiornerup nukittorsalernissaanik oqalunneq tulluutinngilaq, taamaassappat pisassiissutit ikereeqisut piniartut amerlanerusut agguartussanngussammatigik, soorlu qilalukkat qaqortat qernertallu assersuutigigaanni.
Nunatsinni tuniniagassanik tunisassiornerup ineriartortinnissaa Demokraatit aamma tapersersorpaa. Taamaallaalli aalisakkat uumasullu allat uumassusilinnik piujuaannartitsinermi nungulertortussaanngitsut eqqarsaatigalugit.
Uummassusilinnik piujuaannartitsinissaq maanna piumatuallaarnitsinnit salliutinneqartariaqarpoq, kinguaagut aamma piniagassaqartittariaqartariaqarmata.
Maanna peqqussummi atuuttumisut Demokraatit pitsaanerusoraat aaqqissuussinikkut tulluussaasoqassasoq, aalisariutit umiatsiaaqqanit tulluunnerusunik atuilernikkut ineriartortitsinikkut. Eqqiluisaarneq eqqarsaatigalugu, aammali aningaasartuutinik pitsaanerusumik aqutsineq eqqarsaatigalugu.
Demokraatit aamma isumaqarput imarsiornermi isumannaatsuunissaq qulakkeerniarlugu angallatit anginerit aallunneqartariaqartut. Aalisartut isumannaatsuunissaat aamma pingaartittariaqarpoq. Imaatigut ajunaarnerit amerlaneri umiatsiaaqqanik angalanikkut pisarput.
Ajuusaarnarpoq inatsisartut peqqussutaat atuuttoq Naalakkersuisut 2006-imi ukiaanerani ataatsimiinnermi inatsisartut peqqussutaat atuuttoq allanngortinniarlugu maannangaaq eqqarsaleermata, umiatsiaaqqanik 16 aamma 19 fodsit akornanni angissulinnik pisinermi pisortat aningaasaleeqataasarnissaat periarfissinniarlugu.
Taama oqaaseqarluta siunnersuutip itigartinneqarnissaa Demokraatinit inassutigaarput.
Jens B. Frederiksen, inatsisartunut ilaasortaq
Demokraatit/Demokraterne