Samling

19. november 2003                                                                                                           UKA 2003/27

Inuussutissarsiutitigut ilinniartitaanerni regionskoleqartitsineq pillugu Naalakkersuisunut apeqquteqaat. Perorsaanermik Ilinniarfiup Ilulissaniittup illoqarfimmi kujasinnerusumiittumi inis­saaleqiffiunngitsumi, assersuutigalugu Paamiuni, immikkoortortaanik pilersitsinissamik Naa­lakkersuisut isumaliuteqarpat.

(Inatsisartunut ilaasortaq Doris Jakobsen, Siumut)

Akissuteqaat

Siullermeerneqarnera

(Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq)

 

 

Inatsisartunut ilaasortaq Doris Jakobsen apeqquteqarneranut Naalakkersuisut qutsavigaat. Apeq­qutit taamaattut Naalakkersuisunut apeqqutigineqallattaartarput, tassa apeqqutigineqarajuttarlutik ilinniak­kat imaluunniit taakkua immikkoortuisa ilaat sumiiffinnut suliffissaaleqiffiusunut, imaluunniit inis­saaleqiffiunatillu kollegiassaaleqiffiunngitsunut nuunneqarsinnaanersut. Taamaattumik piffissaq ilu­atsillugu Naalakkersuisut makkua oqaatigerusuppaat:

Perorsaanermik Ilinniarfiup Ilulissaniittup qitiusumik perorsaasunngorniartitsinerup saniatigut aap­paagumiit ilinniartitaanerit uku marluk neqeroorutigilerniarpai:

-     Najugaq qimannagu perorsaasunngorniartitsineq (misiligummik 2004-mi upernaakkut aallar­tisarneqalersussaq)

-     Isumaginninnermi ikiortinngorniarneq qaffatsillugu nutarsagaq (august 2004-mi aallartisarne­qartussaq).

Ilinniakkat taakku marluk 2004-mi aallartisarneqarnissaanut apeqqutaaju­maarpoq aningaasaliinissa­mut oqar­tussaasut aku­ersissuteqarumaarnissaat.

         

Najugaq qimannagu perorsaasunngorniartalernissaq pillugu Naalakkersuisut oqaatigissavaat ilinniar­titaasalernissaq siullermik misiligutitut annikinnerusutut kommuunini marlunni (Nuup Kommunia­ni aamma Sisimiut Kommuniani) ingerlanneqassammat, taamaaliornermilu misissorneqassalluni taamatut

najugaq qimannagu ilinniartitsisalernissami ilinniagassatigut ilinniartunngortitsisarnissatigullu periarfissat qanoq issaner­sut. Taamaalilluni aatsaat ukiut pingasut qaangiuppata malitsigitillugu nalilersuinissap takutikku­maarpaa najugaq qimannagu perorsaasunngorniartalernissaq nuna tamakkerlugu siammarneqarsin­naajumaarnersoq.

Aningaasaliissutinik pisariaqartunik pissarsisoqarsinnaappat Naalakkersuisut piumassuseqarput misissussallugu najugaq qimannagu perorsaasunngorniartunik piginnaaneqartunik naammattunik atuaqatigiinnik 15-20 missaannik inuttaqartunik Paamiuni peqassappat aallartitsinissaq aammattaaq Paamiut Kommuniannut atuutilersissallugu, aammalu Paamiut Kommuniat isumaqataassappat.

Taamaattoq oqaatigineqartariaqarpoq misiligummik ingerlatap aamma Paamiunut atuutsinniarneqarnera ima paasineqaannassammat Paamiuni ilinniartitsisumik aalajangersimasumik atorfinitsitsisoqartariaqassammat ilinniartitsisunik aggersakkanik timelærerinillu atorfinitsitsisarnermik, praktikkernerit ingerlanneqarnerannik kiisalu najugaqartitsinermik suliassanillu allanik aaqqissuussinermut tunngasunik ataqatigiissaarisussamik. Misiligummik ingerlataq pillugu kommunit allat peqataasut assigalugit siunertaavoq ilinniartut atuagarsornerat Perorsaanermik Ilinniarfimmi Ilulissaniittumi ingerlanneqartassasoq. Pissutsit taamaaqataat isumaginninnermi ikiortinngorniarnermi aamma atugaassapput inaarutaasumik brancheskolemi atuarnerat aammalu atuagarsornerat PI-mi Ilulissaniittumi imaluunniit nunap immikkoortuini atuarfiusut tallimaasut ilaanni aamma ingerlanneqartassallutik.

Aaqqissuussinermik tamatuminnga isumaginninnermi ikiortinngorniarnerup inaarutaasumik brancheskolemi atuarnermik aammalu najugaq qimannagu perorsaasunngortitsiniarnerup atuagarsornertaanik IP-imi Ilulissaniittumi imaluunniit nunap immikkoortuini atuarfinni qitiusumik ingerlatsiffiusumik Naalakkersuisut toqqaanerat patsiseqarpoq ilisimasassatigut isumaliutigisassat angisuumik pingaaruteqartut arlallit eqqarsaatigineqartariaqarmata:

Aalajangiisuusumik pingaaruteqarpoq ilinniartitaanerit taakku marluk qitiusumik atuagarsornertaat ilinniarfimmi amerlasuunik ilinniartoqarfiusumi arlalinnillu sammivilinnik ilinniagaqarfiusumi ingerlanneqarnissaat.

Ilinniartitaanerit taakku marluk qitiusumik atuagarsornertaannillu perorsaanermik ilinniarfimmi Ilulissamiittumi imaluunniit nunap immikkoortuini atuarfinni inissinneqarnerisigut ilinniartitaanikkut pissutsit imminnut annertunerusumik attuumassuteqartut avatangiiserineqalissapput, tassami nunap immikkoortuini atuarfiusuni ataasiakkaani aammalu perorsaanermik ilinniarfimmi  ilinniartitaanikkut sammiviit arlalipparujussuit nunap immikkoortuini atuarfinni ataasiakkaani perorsaasunngorniarfimmilu neqeroorutigineqartar­mata.

Tamanna ilisimasassatigut arlalippassuarnik pitsaaquteqartussaavoq, tassami misilittakkat ta­kutimmassuk ilinniarfiup ataatsip iluani ilinniartitsisoqatigiit amerlanerugaangata aammalu ilinniartut amerlanerugaangata, kiisalu ilinniakkat amerlanerugaangata tamanna pissarsiassat ilisimasassatigut aningaasatigullu pissarsiffiunerusartut ilinniagassatigut avatangiiserisat pitsaanerusut kajuminnarnerusullu pigineqalersarnerisigut aammalu “amerlasuu­nik ingerlatsinerup iluaqutissartai” pigineqalersarlutik, tassa imaappoq ilinniartitaanerit akornanni ilisimasassatigut aggornerit pitarlugit suleqati-giinnissamut periarfissarissaarnerusoqalissammat. Tamatuma kingunerissavaa ilinniartut amerlanerusut ilinniagaqarnerminnik naammassinnittalernissaat, aammalu karakteritigut piginnaasassatigullu angusa-rissaarnerusalernissaat.

Taamaattumik Perorsaanermik Ilinniarfiup Paamiuni immikkoortortaqarfippiassaanik pilersitsinissamik eqqarsaat siunnersuutigineqartoq Naalakkersuisut isumaat malillugu tunngavissaqanngilaq; tama­nut ilisimasassatigut pitsaassusissaq pisariaqartoq qulakkeerniarlugu pisariaqarpoq isumaginninner­mi ikiortinngorniat aamma najugaq qimannagu perorsaasunngorniartut tamarmik anginerusunik ilisimasassatigut avatangiiseqarnissaat, tamannalu taamaallaat nunap immikkoortuini atuarfiusuni aammalu perorsaasunngorniarfimmi qitiusumik najugaqarnertigut neqeroorutigineqarsinnaavoq.

Paamiuni SPS-ip immikkoortortaqalernissaanut tunngavilersuutitut Inatsisartunut ilaasortap Doris Jakobsenip aammattaaq oqaatigai ilinniagaqartut kujataamiut atuagarsorluni ilinniarnermik naam­massinniartarnissartik ajornartorsiutiginerusaraat, ilaatigut pissutigalugu Avannaamiut atugarisaan­nik, soorlu qimminik kaperlammillu sungiusimanninnginnertik, kiisalu ilaatigut aamma meeqqamin­nik inooqatiminnillu maqaasisarnertik.

Tassunga oqaatigineqartariaqarpoq Naalakkersuisut ilisimanngikkat kujataamiut avannaamiunut na­leqqiullutik atuagarsornermik sapersaateqarnerusimanissaat. Kisianni Inatsisartunut ilaasortaq Doris Jakobsen ilumoorpoq ilinniarfinniittartut sapaatit akunnerini 20-ni atuagarsorlutik ilinniarfimmiittarnissaminni meeqqaminnik inooqatiminnilluunniit nassarsinnaasanngimmata, aammalu tamanna soorunalimi inuttut amerlasuu­nut artornartarsinnaaqimmat. Tamannali tamanut atuuppoq Nunatsinni suminngaanneersuugaluartu­nulluunniit. 

Kiisalu Naalakkersuisut Inatsisartunut ilaasortamut Doris Jakobsenimut oqaatigerusuppaat Paamiut kommuuniata suliffissaqartitsiniarnikkut inuussutissarsiornikkullu ajornartorsiutinut maanna sorsuu­tiginninnera Naalakkersuisut ilisimaarilluinnaraat. Naalakkersuisulli isumaqarput ajornartorsiutinik taakkuninnga aaqqiiniarnissamut pisariaqartoq atitunerusumik iliuuseqarniarnissaq, taamaaliornermi inuussutissarsiutitigut, suliffissaqartitsiniarnikkut, aningaasatigut, inuuniarnikkut ilinniartitaanikkul­lu alloriaatissat akuliullugit.