Samling

Ikiaroornartut anngiortumik nunatsinnut eqqussorneqarnerisa millisarnissaat siunertaralugu sulinerup annertusarneqarnissaanik Danskit naalakkersuisuinut isumaqatigiissuteqarniarnissamik Naalakkersuisut peqquneqarnissaannik Inatsisartut aalajangiiffigisassaattut siunnersuutip siullermeerneqarnera.

Ikiaroornartut anngiortumik nunatsinnut eqqussorneqarnerisa millisarnissaat siunertaralugu sulinerup annertusarneqarnissaanik Danskit naalakkersuisuinut isumaqatigiissuteqarniarnissamik Atassutip inatsisartunut ilaasortaatitaasa siunnersuutaat Kattusseqatigiit partiat sinnerlugu imaattumik oqaaseqarfigissuara:

Siullermik Kattusseqatigiit partianiit erseqqissaatigissuarput; Kattusseqatigiit partiani periarfissat tamaasa atorlugit ikiaroornartumik atornerluinerup sapinngisamik akiorniarneqarneranut sutigut tamatigut suleqataajuarnissatsinnut piareersimajuaratta, minnerunngitsumik aamma inatsiseqartitsinikkut allatigulluunniit ikiaroornartumik atornerluinerup minnerpaaffissaaniitinneqarnissaa anguniarlugu suleqataanissamut piareersimavugut.

Siunnersuuteqartut tamakkiisumik tapersertariaqarput; ilumut ikiaroornartumik atornerluineq ajornartorsiutaavoq annertoorujussuaq, naak ulluinnarni ilaatigut toqqaannartumik ajornartorsiut imaaliinnarlugu tamatigut takuneqarsinnaasanngikkaluartoq, taamaattoq inunnik isumaginnittoqarfinni, pinaveersaartitsinermik suliaqartuni, peqqinnissaqarfimmi allanilu ajornartorsiutip sunniuteqarfigisartangaasa ersersitsisarnerisigut, ilumut ikiaroornartup annertuumik ajornartorsiutaanera, aammalu annertunerusumik suliniartoqanngippat, taava akiuiniarnermik suliniarnerit sunniutaasa ajoraluartumik maangaannarsinnaanerat aarloqqutigisariaqarpoq.

Tassami ilisimatusarnikkut uppernarsarneqareernikuuvoq; ikiaroornartoq aamma ilaatigut niaqulaarnermut nappaammik assingusumik napparsimalersitsisinnaasoq.

Taamaattumik Naalakkersuisut maanna qanoq iliuuseqarniarnerat aamma tamakkiisumik tapersertariaqarpoq. Piffissamik aggersumi eqqartuussiveqarneq pillugu isumaliutissiissut maani suliarineqartussaavoq.

Taamaattumik Inatsisartunut Naalakkersuisunullu ilungersortumik  kaammattuutigissuarput, minnerpaamik politiit 75-inik amerlineqarnissaat anguniarneqartariaqartoq. Tassami ikiaroornartumik ajornartorsiuteqarneq pimoorunnerullugu aningorniarneqassappat - immikkut politiinik tamakkiisumik ikiaroornartulerisartunik sulisoqalernissaa pisariaqarmat.