Samling

9. maj 2006

UPA 2006/96

   

Naalakkersuinikkut sulinermut aningaasatigut tapiissuteqartarneq pillugu Inatsisartut inatsisaata allanngortinneqarneranik Inatsisartut inatsisissaattut siunnersuut kiisalu Inatsisartuni Naalakkersuisunilu ilaasortat aningaasarsiaqartitaanerat il.il. pillugu Inatsisartut inatsisaata allanngortinneqarneranik Inatsisartut inatsisissaattut siunnersuut.

   

(Siullermeerneqarnera)

   

Suli 2.275.000 kroner-inik. 73 %-inik annikinnerunngitsumik amerleriaat. Tassa partiit Siumut, Inuit Ataqatigiit aammalu Atassutip inuiaqatigiinnut siunissami aningaasartuutissannik artukkiissutiginiagaat.

 

Ullumikkut nunatsinni aningaasaqarnikkut mianernarseruttulernerani nunatta suli aningaasartuutissaanik ilaartueqqinnissaq piffissaanngilaq, tamatumani politikeriusimasunut imminut pilersorsinnaajunnarsimasut aningaasaqartinniarnerinnaanut akissarsiaqartitsinissamut atuinerinnaq.   

 

Siunnersuut pisariaqanngitsumik aningaasartuutaaginnarani Inatsisartut angalasinnaatitaanerinut aammalu inatsisitigut illersugaasumik, aningaasartuutinut missingiusiat killigitaasut iluini, paasisassarsiorluni angalanissamut pisinnaatitaanerinik ajorseriaataavoq. Siunnersuummi pineqartumi partiimi ilaasortap arlaata, immaqa partiiminik isornartorsiuerpaluppallaartumik oqaaseqarsimanerata kingorna, partiiminik angalanissamik itigartitsissuteqarnissamik ammaassivoq. Taama pillaasinnaassutsimik periarfissaqalersitsinissaq Inatsisartunut ilaasortanut ataasiakkaanut iluaqutaanngilaq aammalumi partiini nipangiinnarluni naalagarsiortitaanissamik aqutseriaaseqarluni ingerlatsisuni sakkussat ilassaattut atorneqariaannaavoq. Demokraatit tamanna akuersaarumanngilaat.

 

Siunnersuut ajoraluartumik aammattaaq atorneqarsinnaavoq imaluunniit oqarluaannarluni atornerlunneqarsinnaavoq.

Takorlooriaraanni partiiusut ilaat aningaasaqarnikkut ingerlanerliortuusoq, taava Inatsisartunut ilaasortaasut angalanissaanut aningaasat atugassaagaluit akiligassarineqartunut matussutissatut atorneqarsinnaalissapput tamannalu akuersaarneqarsinnaanngilaq.

   

Siunnersuutip aningaasalersorneqarnissaata kissaatinik arlalinnik kinguneqartitsivoq. Siunnersuuteqartut naatsumik taakkartorpaat aningaasat atugassat naatsorsuutini konto 01-imit maannamut atuuttuni nassaarineqassasut, Inatsisartut Siulittaasoqarfiat. Taama oqaaseqarneq ersarluppoq, erseqqissarneqarnissaalu Demokratinit kissaatigineqarpoq. ICC-imut aningaasaliissutit sipaaruteqarfigineqassappat imaluunniit naalakkersuisooqatigissitaqartut pingasuusut aningaasat sumi nassaarineqarnissaat takorloorpaat. Ullumikkut akissuteqarfigineqarnissaa ajornarsinnaanngilaq naalakkersuisooqatigiissitaqartummi pingasuusut Inatsisartut Siulittaasoqarfiani amerlanerussuteqarlutik inissisimapput Inatsisartullu Siulittaasoqarfiani aningaasaanut missingersuusiat nikisiteriffigineqassappata nammineq suliarisussaallugit.   

 

Demokraatinit qularineqanngilaq siunnersuut saqqummiunneqartoq ullumikkut ilalerneqassasoq, Demokraatillu tungaaniit siunnersuut qularnartoqartinneqaraluartoq qilanaarinanngitsuunngilaq naalakkersuisoqatigiissitaqartut nikisiterinissaasa takunissaa, partiimmi pineqartorpiaat ukiukkut 2006-imi ataatsimiinnermi Demokraatit sipaaruteqarfissatut siunnersuusiaannik isumaqatigiissuteqarfeqarumanngilluinnarlutik oqariartuuteqarnikuummata. Naalakkersuisooqatigiissitaqartulli nikisititerinissamut isumassanik amigaateqassagaluarpata Demokraatit siunnersuusiaasa assilinerinik partiip allaffeqarfianut ulluinnarni nal. 8-p aammalu nal. 16-ip akornani aallernissaminnut tikilluaqqusaapput.        

   

Taama oqaaseqarluta siunnersuut pineqartup itigartitsissutigineqarnissaa Demokraatinit inassutigaarput.

 

Palle Christiansen, gruppimi siulittaasoq

Demokraatit/Demokraterne