Samling

28. april 2006                                                                                                            UPA 2006/79

   

Kommunalbestyrelsinut nunaqarfinnilu aqutsisunut ilaasortanik il.il. kiisalu borgmesterinik borgmesterillu tulliinik akissarsiaqartitsineq pillugu Namminersornerullutik Oqartussat nalunaarutaa nr. 35, 5. oktober 2001-meersoq allannguiffigeqqullugu suliniuteqarnissamik Naalakkersuisut peqquneqarnissaannik Inatsisartut aalajangiiffigisassaattut siunnersuut.

(Inatsisartunut ilaasortaq Olga Poulsen Berthelsen, Inuit Ataqatigiit)

   

Akissuteqaat

(Naalakkersuisut siulittaasuat)

   

Siullermeerineq

 

Inatsisartunut ilaasortap Olga P. Berthelsenip aalajangiiffigisassatut siunnersuutiminut tunngavilersuutaanut ajornartorsiummut tassunga Naalakkersuisut paasinnipput. 

 

Taamaalilluni Nuup Kommuniata saniatigut kommunit allat taamatut inissisimasinnaanerat isumaginninnermi ataatsimiititaliami siulittaasup siusinnerusumut naleqqiullugu suliassaqarnerulersimanera akueriuminaatsinneqarsinnaanngilaq. Ataatsimiititaliat siulittaasuisa siulittaasutut suliassatigut nammakkersugaaneq alliartuinnartoq misigisimammassuk, taamaammat isiginiarneqarnissaannik kissaateqartoqassappat aamma pissusissamisoorpoq.

 

Kommunalbestyrelsinut nunaqarfinnilu aqutsisunut ilaasortanik il.il. kiisalu borgmesterinik borgmesterillu tulliinik akissarsiaqartitsineq pillugu nalunaarut, Nuup Kommunianut immikkut aalajangersagaqarneq siunnersuuteqartup eqqaavai. Aalajangersakkap Nuup kommuniata isumaginninnermi ataatsimiititaliap siulittaasuanut kommuninit allanit qaffasinnerusumik akissarsisitsisinnaanera periarfississavaa. Tassunga tunngavigineqarpoq Nuup Kommuniata  angissutsini pissutigalugu kommuninit minnerusunit isumaginninnikkut ajornartorsiuteqarnerummat.

 

Kisiannili kommunini allani isumaginninnermi ataatsimiititaliami siulittaasoq siusinnerusumut naleqqillugu suliassaqarneruleriartorsimavoq. Ajornartorsiummut tassunga kommunit ilaasa periuseraat, ilaatigut politikkikkut suliassanik suliarinninnernik soorlu assersuutigalugu isumaginninnermi ataatsimiititaliamit meeqqerivinnik meeqqanut inuusuttunullu ataatsimiititaliamut nuussinerit. Taamatut kommunini politikkikkut ataatsimiititaliat aaqqissuussaanerannik aaqqissuusseqqinnerit iluaqutigalugit isumaginninnermi ataatsimiititaliami suliassat oqilisaaffigineqarneri pisinnaapput.

 

Aaqqissuussaanermut Isumalioqatigiissitat Kalaallit Nunaanni kommunit aaqqissuussaanerata allanngortinneqarnissaanik nalunaarusiaminni siunniussaqarput, taamaalilluni maannakkut kommunit 18-usut kommunit annerusunngorlugit ikilisinneqassallutik. Aamma Namminnersornerullutik Oqartussaniit suliassanik arlalinnik kommunit tigusinissaat siunniunneqarpoq.

 

Inatsisartut nalunaarusiami inassutigineqartut isummerfigereerpatigit  Kalaallillu Nunaanni kommunit aaqqissuussaanerannik aaqqissuusseqqinneq naammassineqarpat, kommuninut tunngasunut malittarisassanik assigiinngitsunik iluarsaassinissaq pisariaqartinneqassaaq. Kommunalbestyrelsinut nunaqarfinnilu aqutsisunut ilaasortanik il.il. kiisalu borgmesterit borgmesterillu tulliinik akissarsiaqartitsinermut tamanna aamma atuuppoq.

 

Taamaammat  aaqqissuusseqqinnerup naammassineqarnissaata tungaanut nalunaarutip iluarsaannissaata utaqqisinneqarnissaa Naalakkersuisut inassutigaat. Taamaattumik aalajangiiffigisassatut siunnersuutip maannakkorpiaq akuersissutigineqarnissaa Naalakkersuisut inassutigisinnaanngilaat. Soorunami nalunaarut iluarsaanneqalerpat siunnersuuteqartup ajornartorsiutit saqqummiussai Naalakkersuisut isiginiassavaat.