Samling
ATASSUT UPA2005/45-grl
Arkalo Abelsen 29. april 2005
Ilinniartunut ilaqutariinnut inissiat akiisa, ilinniartunut kisimiittunut meeralinnut nalimmassarneqarnissaat anguniarlugu Naalakkersuisut peqquneqarnissaannik Inatsisartut aalajangiiffigisassaattut siunnersuut.
(Inatsisartunut ilaasortaq Doris Jakobsen, Siumut)
Siullermeerneqarnera
Inatsisartunut ilaasortaq Doris Jakobsen saqqummiussaqarpoq ilinniartunut ilaqutariinnut inissiani akiliutaasartut nalimmassaaffigineqarnissaannik siunertalimmik. Tunngavilersuutini assersuutini kialluunniit takusinnaavaa annertoorujussuarmik equngasoqartoq. Ineqarnermummi akiliisoqareertillugu nerisassanut, atisassanut allanullu ulluinnarni pisariaqartitatsinnut atugassat ineqartunut assigiinngeqaat.
Atassummi isumaqarpugut Naalakkersuisut kollegiani ajornartorsiutit allat suugaluarnersut aaqqiiviginiarneqarnerannut uani siunnersuummi pineqartumik iluarsiiniarnerat utaqqineqarsinnaanngitsoq, unali siunnersuummi pineqartoq periarfissaq siulleq atorlugu aaqqiivigineqartariaqartoq. Atassummit qulakkeerusupparput anaanat ataatallu kisermaat kollegiani ineqarnermut akiliutimikkut oqilisaanneqarnissaat. Uanimi ajornartorsiut pineqartoq aaqqiivigineqanngikkuni allaat ilinniartut ilaasa ilinniarnerminnik unitsitsiinnarnerannik kinguneqarsinnaavoq. Tamanna Nunatta akissaqartinngilaa
Atassummit siunnersuut tamakkiisumik taperserparput aappassaaneerneqannginnerminilu Kultureqarnermut, Ilinniartitaanermut, Ilisimatusarnermut, Ilageeqarnermullu Ataatsimiititaliami suliarineqarnissaanut innersuullugu.