Samling
UPA 2004/121
29. april 2004
kk
Inuit nunaqarfinni inoqarfinnilu ineriartoqqinnissamut periarfissaqarfiunngitsuniittut allani periarfissaqarfiunerusuni inuunermik nangitsiinnarnissamut periarfissiisutissanik, Naalakkersuisut sulissuteqaqqullugit peqquneqarnissaannik Inatsisartut aalajangiiffigisassaattut siunnersuut.
(Siullermeernera)
Kalisat Lund-ip siunnersuutaa nunaqarfimmiunut atugassarititaasut kingumut eqqartorneqaleruttorneranni saqqummiunneqarpoq. Siunnersuuteqartoq ilumoorpoq pissutsit piviusut sunilluunniit aalajangersaaniarnermi tunngavigisariaqarmata aamma ilumoorpoq nunaqarfiit ataatsimut isigalugit inui ikiliartortuarmata. Kisianni aamma maluginiagassaavoq nunatsinni innutaasut najugaqarfinnut agguataarsimanerat arriitsuararsuarmik allanngoriartormat, tassa oqaluttuarissarnerput eqqarsaatigalugu illoqarfinnut nutsernerujussuaq unikaallassimavoq – tassa aamma pissutsit piviusut ilaat. Tamanna nunaqarfinni inoorusuttoqarneranut illoqarfinnilu periarfissat killeqarnerannut, pingaartumik inissaqarniarneq eqqarsaatigalugu, isumaqarpugut takussutissasoq.
Nalunngilarput nunatsinni inuuneq sumi najugaqarneq naapertorlugu assigiingitsorujussusinnaasoq, avannarpiaaniit kujaterpiaanut, kitaaniit kangimut, illoqarfinniit nunaqarfinnut, tamanna aamma piviusuuvoq. Tassa oqaluttuarisaanermi qanga siulit nunniffigisimasaat, silap pissusia inuussutissarsiornikkullu periarfissat inuit sumi najugaqarnerannut suli annertunerpaamik aalajangiisuupput.
Siunnersuuteqartup nunatsinni inoqarfiit akornanni nutsertarnerup aaqqissuussamik nakkutigisaasumillu pisarnissaanik oqaaseqarnera isumaqatigaarput – kisianni aamma tamanna kommunini amerlanerni pissuserineqareersoq nalunngilarput.
Aamma inuiaqatigiit pisuussutaasa atorluarneqarnerunissaat isumaqatigilluinnarparput, tamannalu suliffeqarfiit ingerlatseqatigiiffiillu suleqatigiinnerunerisigut pisinnaasoq isumaqarpugut.
Inuit Ataqatigiit-nni pingaartipparput kikkulluunniit naalakkersuinikkut aalajangersaanerni pineqartut qanoq sunillu pisariaqartitsinerat naapertorlugu aalajangersaasoqartassasoq. Nunaqarfimmiut pineqarpata taava aamma taakkuusariaqarput siulliullutik aalajangiisartunut apuussaqartussat.
Massakkut nunatsinni kommunini kommunillu akornanni aaqqissuusseqqinnissamik siunnersuusiortitsisoqarpoq ukiuni marlunni sulisussanik. Naalakkersuisunut inassutigissavarput ataatsimiititaliami tassani nunaqarfimmiut toqqaannartumik sinniisoqalernissaat isumageqqullugu, kommunit aaqqissuunneqaqqinnissaanni nunaqarfiit illoqarfiillu kommuneqatigiittut ataatsimoortumik siunnerfeqarnissaat pingaaruteqarmat, nunaqarfimmiullu toqqaannartumik sunniuteqarnissaat pisariaqarmat.
Naggataagut naalakkersuisut akissuteqaatiminni massakkut suliniutigineqartunik nassuiaataat naapertorlugu immikkut pilersaarusioqatigiittussanik pilersitsinissaq pisariaqanngikkallartoq oqaatigimmassuk isumaqatigaarput. Suliniutigisani massakkut nunaqarfinni aqutsisut oqartussaaffeqarnerulernissaat pisinnaatitaafeqarnerulernissaallu pingaarnerpaatut isigaarput. Soorunami aamma naalakkersuisut nunaqarfinnik inuerusaanissaq siuinertarineqanngitsoq erseqqissaatigalugu oqaatigimmassuk isumaqatigaarput – naak siunnersuuteqartoq inuerusaanissamik siunertaqartutut pasillinngikkaluarlugu.