Samling
DANSK TEKST MANGLER
UPA2003/37.1
5.marts 2003
Agathe Fontain
Imaanut aqqartartutut suliaqarneq aqqartartullu atortui il.il. pillugit inatsisip Kalaallit Nunaanni atortuulersinneqarnissaanut Namminersornerullutik Oqartussat oqaaseqaataat pillugu aalajangiiffigisassatut siunnersuut.
Imaani aqqartartoqarnermi inatsisip allanngortinneqarnissaanut atatillugu inatsisip ullutinnut naleqqussarneqarnissaata pisariaqalersimanera Inuit Ataqatigiinniit paasilluarsinnaavarput.
Inatsit 1979-imili nunatsinni atortuutinneqalersimasoq suli ullumikkut atuuppoq, taassumali assinga Danmarkimi 1995-imili allanngortinneqarsimalluni. Ilisimavarpullu ukiut 20-it sinnerlugit qaangiunnerani atortutigut allatigullu ineriartorneq sukkasuumik ingerlasimasoq, taamaattumillu nunatta aqqartartoqarnerup tungaatigut inatsisitigut malinnaatinneqarnissaa pisariaqarluinnarluni.
Manna iluatsillugu Inuit Ataqatigiinniit siunissaq eqqarsaatigalugu allanik nutartigassanik malinnaaniarnissaq pingaaruteqarmat kaammattuutigissavarput nunatta malinnaatinneqarluarnissaa eqqumaffigilluarneroqqullugu.
Malinnaatinneqartussanut aamma ilaapput qatserisartut, qatserisartut annaassiniarnerminni aqqartartutut sulisariaqartarnerini, aqqartartutut sulinerminni allagartaqarnikkut inissisimaneri, minnerunngitsumik sillimmasiinikkut inissisimanerisa qularnaagassartaat.
Naatsorsuutigissavarput Naalakkersusisup tamanna aamma alaatsinnaasgaa
Taamatut oqaaseqarluta imaani aqqartartutut suliaqarneq aqqartartullu atortui pillugit inatsisip nunatsinni atortuulersinneqarnissaanut siunnersuut Inuit Ataqatigiinniit tapersersorparput.