Samling

Ordførerindlæg (IA)- 3

Partiit oqaaseqaataat (IA)- 3

UPA 02-22.3

14. maj ‘02

Josef Motzfeldt

Inatsisartut 2001-imi ilassutitut aningaasaliissutinut inatsisissaattut siunnersuut pillugu Ilassutitut Isumaliutissiissut, inatsisissatut siunnersuutip pingajussaaneerneqarnerani Inatsisartut Aningaasaqarnermut Ataatsimiititaliaanit saqqummiunneqartoq pillugu

Inuit Ataqatigiit iluaralugu maluginiarpaat inatsisissatut siunnersuutip aappassaa-neerlugu oqaluuserinerani Aningaasaqarnermut Ataatsimiititaliap isumaliutissiissummigut  naalakkersuisunut itisilerlugit akineqaqqullugit apeqqutaasa akineqanngingajalluinnarsimanerannut uparuaanerput Aningaasaqarnermut Ataatsimiititaliap ilalerlugu ullumikkut isumaliutissiissummigut oqaaseqarfigimmagumagu.

Aappassaaneerinninnermi Aningaasaqarnermut naalakkersuisup Aningaasaqarnermut Ataatsimiititaliap apeqqutaasa akisimannginnerinut, apeqqutigineqartunut landskarsip naatsorsuutaannut tunngasuuneraanera akissuteqarnissamut piareersimannginnerinnarmik pissuteqarami ilumuunngilaq.

Assersuutitut marlussuit uku Inuit Ataqatigiit saqqummiutissavagut:

- NuKa A/S-ip aamma Royal Greenlandip niuernikkut pilersaarumminnik kingusinnerpaamik marsi aallartitsinnagu naalakkersuisunut saqqummiinissaanik ujartuineq. Tamanna Inatsisartut piumasaraat piginneqataassutit katillugit 240 mio kr-nik qaffanneqarnissaat akuerigamikku.

- Aningaasaliiffinnut 30.10 aamma 3013-imut tunngasut decemberi qiteqquttoq Aningaasaqarnermut Ataatsimiititaliamut nassiunneqartut paasissutissanik amigartunik eqqunngitsuusorinartunillu toqqammavilersorneqarsimasut, naalakkersuisunut Aningaasaqarnermut Ataatsimiititaliap nassuiaateqarfigeqqusai, minnerpaannguamilluunniit landskarsip naatsorsuutaannut tunngasuunngillat, taamaattumik naalakkersuisunit akisussaassuseqartunit suliaminnillu ilisimasaqartariaqartunit akineqartariaqartut.

Aamma taama ippoq ukiup aningaasaliiffiusup ingerlanerani atunngitsoorsimasat sippuilluniluunniit atorsimasat aningaasaliissutit 2 %-iisa ukiumut tullermut nuunneqartarsinnaanerannut Aningaasaqarnermut Naalakkersuisup Inatsisartut Aningaasaqarnermut Ataatsimiititaliaanut akissuteqaataasa 23. aprilimeersut aamma majip arfernganneersut assigiinngissutaanut apeqqummi. Naalakkersuisut qanoq isummerpat?

Meeqqanut inuusuttunullu paaqqinniffiit kommunillu akiliutaat

Aningaasaqarnermut Ataatsimiititaliap maluginiagaattut naalakkersuisullu ilisimariigaattut pisussaafik matumani pineqartoq kommunit susassaqarfigaat.

Aamma tamanna naalakkersuisut KANUKOKA-llu ukioq mannamut ukiumoortumik isumaqatigiissutaani erseqqissarneqarpoq. Tassani ilaatigut ima allassimasoqarmat:

“Kiisalu illuatungeriit isumaqatigiipput Namminersornerullutik Oqartussat aammalu KANUKOKA ukiup aningaasanut inatsiseqarfiusup ingerlanerani isumaqatigiinniartarnerit aqqutigalugit ullormut unnuamullu siumoortumik akiliutaasartumik iluarsiinissamut periarfissaqassasoq.”

Ukioq mannamut Isumaginninnermut naalakkersuisoqarfiup 30 mio kr-nik susassaqarfimmi matumani pineqartumi sippuisariaqarnerminik Inatsisartut Aningaasaqarnermut Ataatsimiititaliaanut ilisimatitsissutai misissorlugit paasinarpoq sippuinissanut aningaasartuutissat amerlanersaat, isumaqatigiissut najoqqutaralugu kommuninit akilerneqartussaasut.

Ilassutitut aningaasaliissutinut inatsit taama ukiumiit ukiumut matooraaniarnernut atorneqartariaqanngitsoq Inuit Ataqatigiit isumaqarput.

Meeqqanut inuusuttunullu ajornartorsiut annertuujummat tamakkiisumik aaqqiivigineqartariaqartoq Inuit Ataqatigiit ataatsimiinnermi matumani arlaleriarluta ujartuiffigigaluarparput, tusaajumaneqanngitsumik.

Ukiorli aningaasaliiffik manna ajornartorsiut sorlaqarfiatigut iluarsiiviginagu Aningaasanut Inatsisip ukioq manna atuuffia aallartilaaginnartoq Ilassutitut Aningaasaliissutinut Inatsisikkut aaqqiivigipalaarniarneqarpoq, Aningaasanut Inatsisikkut aningaasaliissutaasimasut 24 % angullugit qaffaaviginiarnerisigut.

Inuit Ataqatigiit periutsimut tamatumunnga taarsiullugu piumasarissaraarput, naalakkersuisut apeqqummut, meeqqanut inuusuttunullu tunngasumut tamakkiisumik pilersaarusiussasut, kommunit kattuffiat peqatigalugu. Tamatumunngami isummannaarinissamut siunnersuusiortussamik siornali suleqatigiissitaliortoqarnissaa neriorsuutaareeraluarpoq, paasitinneqarnerput malillugu suleqatigiissitaq pineqartoq aatsaat ulluni kingullerpiani pilersinneqarsimavoq.

Pilersaarut naammassineqartoq Inatsisartut 2002-mi ukiakkut ataatsimiinnissaannut aningaasatigut nassatarisassai ilanngullugit Inatsisartunut isummerfigisassanngorlugu saqqummiunneqassooq.

Taama oqaaseqarluta, Ilassutitut aningaasaliissutinut Inatsisissatut siunnersuut akuerseqataaffigissagatsigu nalunaarutigaarput.