Samling
Dansk tekst mangler
UPA 2002/74.1
17.04 2002
Johan Lund Olsen
Nakkutilliisoqarfimmik aktiaateqarluni piginneqatigiiffinnik Namminersornerullutik Oqartussanit pigineqartunit sukumiisumik nakkutiginnittussamik pilersitsinissaq pillugu aalajangiiffigisassasut siunnersuut.
Siullermeernera
Inuit Ataqatigiit pingaartipparput aktiaateqarluni ingerlatseqatigiiffiit Namminersornerullutik Oqartussanit ilaannakortumik tamakkiisumilluunniit piginneqataaffigineqartut maannamit pitsaanerujusuarmik nakkutigineqarsinnaaleqqullugit maannamiillu inuiaqatigiinnut ammanerusumik ingerlatsiviusinnaaleqqullugit erseqqiinnerusunik malittarisassaqartitsilernissatsinnut piffissanngortoq, kinguartiteriuarnissamullu Inatsisartut aamma pissutissaqanngilluinnartugut.
Pisariaqartitsisoqavinnera maani najuuttunit tamanit naluneqanngilluarmat, aammalumi oqaluuserisatsatsinni tullinnguuuttumi, tassalu Misissuisussatut ataatsimiitita-liorsinnaalernissatsinnut piginnaatinneqalernissamik Inuit Ataqatigiinnit siunnersuutigineqartutuut tamanna uppernarsarneqareermat, taamaammat tamanna takisuuliutiginagu ilisimatitsissutigiinnassavarput Inuit Ataqatigiit ukiuni arlalinngortuni aktiaateqarluni ingerlatseqatigiiffiit Namminersornerullutik Oqartussanik ilaannakortumik tamakkiisumilluunniit piginneqataaffigineqartut annertunerusumik inuiaqatigiinniit nakkutigineqartalernissaat anguniarlugu maani Inatsisartuni siunnersuuteqartarsimagatta.
1994-imi upernaakkut aappassaanik Inatsisartuni ataatsimiittoqarmat – taamani siullerpaamik Inatsisartut Ombudsmandeqalissagatta siunnersuutigivarput Ombudsmandip aamma Namminersornerullutik Oqartussat ingerlatseqatigiiffissui nakkutiginnittooqataaffigilertariaqarai, ajoraluartumilli taamani iluatsinngitsumik.
1996 upernaakkut katersuunnitsinni Inuit Ataqatigiit siunnersuutigivarput Misissuisussatut ataatsimiititaliorsinnaanissatsinnut namminerisatsinnik inatsiseqalertariaqartugut. Ukioq taanna – tassalu Inatsisartut ukiakkut ataatsimiinneranni aamma siunnersuuteqarpugut Namminersornerullutik Oqartussat aktiaateqarluni ingerlatsiveqarfissui Nakkutilliiveqartinneqartariaqartut (Tilsynsråd for A/S’er) kommunit susassaqartullu allat peqataaffigisaannik suliffeqarfissuit tamakku aamma nakkutigineqarnerusinnaaniassammata.
Taamaattumik siunnersuuteqartarnivut tamakku eqqaasitsiutigalugit uggorilaanngitsuunngilarput matumani aalajangiiffigisassatut siunnersuuteqartoq tigussaanerusumik qanorlu iliortariaqarnermik tikkuussinerusumik siunnersuusiorsinnaasimanngimmat. Oqaatigineqareersutulli oqaluuserisassatsinni tullinnguuttumi Inuit Ataqatigiit siunnersuutigisaannut siunnersuuteqartoq tapersiuteqarnermigut taamak periarfissaqalissammat, aalajangiiffigisassatut siunnersuutaa taamak isikkoqartillugu maanna akuerisinnaanngilarput kaammattuutigissalluguli oqaluuserisassatta tulliani Kattusseqatigisanilu ilagalugit siunnersuuteqartoq tapersersuilluarumaartoq.
Naalakkersuisut siulittaasuata siunnersuuteqartumut akissuteqaataa taamaattumik annertunerusumik aamma oqaaseqarfiginngikkaluarlugu tikkuaannassavarput ingerlatseqatigiiffiit ukioq affakkaartumik naatsorsuutinik saqqummiussisalernissaannik piumasaqarfigineqartalernissaat, taamatullu aamma ingerlatsinerminni ammanerusumik periaaseqalernissaat siunertaralugu iliuusissanik aqqutissiuussisoqarnissaanut Inuit Ataqatigiit isumaqataammata, soorlumi Børsen-imi ingerlatseqatigiiffiit allat taamatut maanna nalunaartussaatitaallutik aamma pisussaatinneqartut (Børsnoterede selskaber).
Taamatulli oqaaseqareerluta naggataatigut aamma piumasarissavarput ingerlatseqatigiiffiit (selskabit) pillugit inatsisit naatsorsuutinillu kukkunersiuisartoqarneq pillugit inatsisit (revisorlovgivningen) – kingullermillu Inatsisartunit 1994-imi sammineqartut – sukumiisumik qimerloorneqaqqissasut Nunatsinni pissusiviusunut inuussutissarsiornikkullu Nunatsinni ukiuni nutaani makkunani immikkut atukkatsinnut naleqqussaavigineqaqqullugit.
Taamatullu oqaaseqarluta siunnersuuteqartup aalajangiiffigisassatut siunnersuutigisaa manna taamatut isikkoqarallartillugu Inuit Ataqatigiit akuerisinnaanngikkaat nalunaarutigivarput.