Samling
26. september 2001 UKA 2001/73
Illersornissaq pillugu 1951-imi danskit amerikamiullu isumaqatigiissutaata allanngortinneqarnissaa pillugu aalajangiiffigisassatut siunnersuut
(Inatsisartunut ilaasortaq MalînánguaK Marcussen Mølgaard)
Akissuteqaat
(Naalakkersuisut Siulittaasuat)
Inatsisartunut ilaasortaq MalînánguaK Marcussen Mølgaard Inatsisartut suleriaasianni § 32 naapertorlugu aalajangiivigisassatut siunnersuuteqarpoq danskit amerikamiullu illersornissamut isumaqatigiissutaata 1951-imeersup erseqqissumik allanngortinneqarnissaanut tunngassuteqartumik.
Ilumoorpoq isumaqatigiissut ullumikkut ilisimasatsinnit allaaneroqisunik tunngaveqarluni isumaqatigiissutigineqarsimammat. Nunasiaanerup nalaani aammalu nunatta namminersornerulernera sioqqullugu isumaqatigiissutigineqarsimavoq. Taamaammat taassuma nutartertariaqalernera uangattaaq isumaqataaffigiinnarsinnaavara.
Taamaattumillu 1997-imi danskit naalakkersuisui uagut Naalakkersuisunit siunnersuuteqarfigaavut danskit naalakkersuisui uagullu Naalakkersuisut isumaqatigiinnialissasugut USA-mut isumaqatigiissutip nutaamik isumaqatigiinniutigineqarnissaanik piareersarnissaq pillugu, tassa nunarput isumaqatigiissummut peqataalerniassammat.
Danskilli naalakkersuisuisa illersornissamut isumaqatigiissut nutaamik isumaqatigiinniutigineqartariaqartutut isiginngilaat, tassagooq nunatta illersorneqarneranut suli pitsaasumik toqqammavissaammat iliuuseqarnissamullu periarfissaqarluarmat. Danskillu naalakkersuisuisa aamma oqaatigaat amerikamiut isumaqartut isumaqatigiissutip nutaamik isumaqatigiinniutiginissaa pisariaqanngitsoq.
Kiisalu aamma danskit naalakkersuisui isumaqarput angusassat, Naalakkersuisut nutaamik isumaqatigiinniarnikkut angorusutaat, illersornissamut isumaqatigiissutip ilassutissaanik isumaqatigiissuteqarnikkut anguneqarsinnaassasut, soorlu isumaqatigiissutip avatangiisinut tunngasumik ilassuserneqarneratigut.
Nunatta EF-mit aninermigut immikkut inissisimalerneranut tunngatillugu oqarsinnaavunga illersornissamut isumaqatigiissut eqqarsaatigalugu nunarput immikkut inissisimasoq. Tassami illersornissamut isumaqatigiissut nunatta illersorneqarnissaanut isumaqatigiissutaavoq. Kisiannili inatsit tunngaviusoq naapertorlugu, kiisalu namminersornerulerneq pillugu inatsit naapertorlugu danskit naalakkersuisui tassaapput illersornissamut isumaqatigiissuteqarnissamut pisinnaatitaallutillu nutaamik isumaqatigiinniarsinnaatitaasut.
Naalakkersuisuni paasivarput danskit naalakkersuisuisa suliami matumani isumaat allanngorsimanngitsoq. Taamaattorli danskit naalakkersuisui uagullu Naalakkersuisut isumaqatigiippugut illersornissamut isumaqatigiissut isumaqatigiissummut ilassutit atorlugit nutarterneqarnissaa anguniarniassagipput, taakkulu atorlugit aamma nunarput isumaqatigiissuteqartunut peqataasussanngorlugu.