Samling
Dansk tekst mangler
Nuuk, 15. maj 2002
UPA 02/5.2
Asii C. Narup/IA
Aningaasanut inatsimmi kontumut 87.72.10-mut, nuummi sulisunut inissiat, suliassat tunngavigisaata allanngortinneqarnerat pillugu Inatsisartut aalajangiiffigisassaattut siunnersuut.
Aappassaaneerinninneq
Inuit Ataqatigiit Aningaasaqarnermut Ataatsimiititaliaq sukumiisumik imartuumillu isumaliutissiissusiorneranut qujarusuppugut.
Peqatigitillugulu Siulittaasoqarfik uparuanngitsoorusunngilarput Aningaasaqarnermut Ataatsimiititaliap isumaliutissiissusiaminik Inatsiartunut saqqummiiniarluni qinnuteqaataanut itigartitsisimammat. Inuit Ataqatigiinni isumaqarpugut ataatsimiititaliat isumaliutissiissutinik saqqummiiniarlutik qinnuteqaataat Siulitaasoqarfimmi ilassilluarneqartarnissaat pissusissamisoornerusoq.
Aalajangiiffigisassatut siunnersuutip matuma siullermeerneqarnerani Inuit Ataqatigiit akuersaarlugu oqaartigaarput, matumuunalu erseqqissassavarput ullumi aamma akuerseqataalluta taasiumaaratta.
Taamaakkaluartoq pingaartillugu oqaatigissavarput Aningaasaqarnermut Ataatsimiititaliap uparuaatai tamakkiisumik taperserpagut, naatsorsuutigaarpullu Ineqarnermut, Attaveqarnermut Pilersuinermullu Naalakkersuisup taakku tamaasa tusaaniarlugit, malinniarlugillu suleriaqqissasoq.
Aningaasaqarnermut Ataatsimiititaliap uparuaatai arlaqartut Inuit Ataqatigiit tungaannit oqaaseqarfigitsiassavagut:
Siullermik: sulisunut inissiat sanaatugassat angissusissaannut tunngasoq. Ippigaarput upernaaq manna Josef Motzfeldtip inissiat angissusilerneqartarnerannut tunngasumik oqaluuserisassanngortitsineranut atatillugu Naalakkersuisup taamani akissuteqarluni oqarnera, tassa inissiat marlunnik initallit 60 m2 -init anginerusassanngitsut, Taamaakkaluartoq aalajangiiffigisassatut siunnersuummi matumani inissiat marlunnik initallit 61-70 m2-iulutik, anginerpaamik 60 m2-iunatik.
Aappassaanik: Qaqiffik-mut tunngasoq. Isumaliutissiissummi erseqqissarneqarpoq sulisunut inissialiassat sanaartorneqalerpata maanna Qaqiffiup illusimaffigisaa piiarneqartussanngussasoq. Paasinarsivorlu Naalakkersuisut Qaqiffimmut nutaamik illuliornissartik pilersaarusioraat.
Inuit Ataqatigiinni pingaarteqaarput nunatsinni imerajuttut taakkulu ilaqutaasa katsorsarneqarnissamik pitsaasumik neqeroorfigineqarnissaat.
Erseqqissassavarpulli apeqqutip Qaqiffik-mut tunngasup, siunissamilu ingerlariaqqinnissaanut tunngasup, ukiamut Aningaasanut Inatsisissamut siunnersuutip suliarineqarneranut atatillugu tamakkiisumik naliliiffigineqarnissaa naatsorsuutigilluinnaratsigu. Taamaattumik erseqqissassavarput sulisunut inissianik sanaartornissamut tunngasoq matumani taamaallaat isummerfigigatsigu. Ilanngullugu oqaatigissavarput Aningaasaqarnermut Ataatsimiititaliap kaammattuutaa ilaleratsigu, tassa Qaqiffiup siunissami inissisimaffissaanut tunngasoq Nuup Kommuneanik suleqateqarnikkut aaqqiivigeqqullugu. Tamatumunngalu periarfissaqanngippat kommunimik allamik suleqateqarnikkut aaqqiissuteqarnissaq ujartorneqassasoq.
Naggasiutigalugu kissaatigissavarput apeqqut Qaqiffik-mut tunngasoq peqqissaartumik ukiap tungaanut suliarineqarnissaa - Peqqinnissamut Ataatsimiititaliaq qanimut suleqatigalugu.
Taamatut oqaaseqarluta nalunaarutigaarput aalajangiiffigisassatut siunnersuutip akuerseqataaffigalugu taasissagatta.