Samling

Dansk tekst mangler

ATASSUT                                                                       UKA2004/95/ka

Godmand Rasmussen                                                 08.10.2004

 

Meeqqanik inuusuttunillu pinngitsaaliissummik arsaarinninnermut atatillugu inissiivissaqarnerup qulakkerneqarnissaata nunatsinni inatsiseqarnermut ilanngunneqarnissaanik Naalakkersuisut suliuniuteqaqquneqarnissaat pillugu Inatsisartut aalajangiiffigisassaattut siunnersuut.

(Astrid Fleischer Rex, Demokraatit)

 

Siullermeerneqarnera.

 

Inatsisartuni ilaasortap Astrid  Fleischer Rex Demokratineersup siunnersuutaanut ATASSUT-mit imatut oqaaseqaatseqassaagut:

 

Meeqqat inuusuttuaqqallu angerlarsimaffimminnit qimagutsinneqartariaqartut inissarsiortutulli utaqqisinneqartut amerlassusaat Ilaqutariinnermi Pisortaqarfimmit erseqqissumik manna tikillugu oqaatigineqarsinnaanngimmat siunnersuuteqartoq peqatigalugu ATASSUT-mi assut eqqarsarnartoqartipparput akuersaarsinnaanagulu.

 

Tupinnaqaarmi akuersaaruminaallunilu illuatungaani attaveqaatitigut atortorissaarutit ineriartupiloornerat inuiaqatigiinni allatigut tamatigut iluaqutigalugu paasissutissat issariarnerinnarmi pissarsiarineqarsinnaasut nalaaniilluta meerartavut inuusuttortavullu sumiginnakkat pillugit paasissutissat erseqqissut maannamut pigineqanngimmata.

 

Akuersaaruminaannerpaavorli paasissutissat pissarsiariuminaassimaqisut taakku utoqqatsissutaaqataammata iliuusissat kinguarsarneqartuarnerannut.

 

Sakkortussagaluarpalluunniit ATASSUT-mit Inatsisartoqativut silammut igalaakkut qiviaqqussavassi, taqqama ukiussamut taartalereerluni, nillertereerluni aamma qiianarsisalereerpoq, ukiussaq eqqanaraluttuaq!

 

Ullumikkorpiaq inuiaqatigiinni sanngiinnerpaartavut, ikiortariaqarnerpaartavut, sumiginnakkavut meerannguit, allaat mikisut, inuusuttuarannguillu qassimmita tujormillutik, iluamik nerisinneqassanatik, toqqissisimaffissaqaratik, kisimiitsitaasaramik imminut paaqqutarisariaqarlutik maani nunami inooqataappat? Naalakkersuisup akisussaasup Inatsisartunut tamanna ilisimatitsissutigisinnaanngilaa!

 

ATASSUT-mit eqqortoq miserratigineqarsinnaanngitsorlu oqaatigissavarput:

Meeqqat inuusuttullu ikiorserneqartarnissaannik nutaamik peqqussusiortoqareeraluartoq ullumikkut pineqartunut sullisseriaaseq periaaserlu piaarnerpaamik iluarsiivigineqanngippat kingulissatsinnut aamma nukinnik annertoqisunik atuiffiusassassoq ATASSUT-mit sakkortuumik aarleqqutigaarput.

 

Nunatsinni angerlarsimaffiup avataanut inissiisarnermut atatillugu utaqqisunut allattuiffiit atorneqassanngitsut, allatut oqaatigalugu meeqqat inuusuttullu angerlarsimaffimminnit qimagutsinneqartariaqartut, pingaartumik sumiginnagaanerup kingunerisaanik ulorianartorsiortinneqartut piaarnerpaamik angerlarsimaffiup avataanut inissinneqarnissaat inatsisitigut piumasaqaataassasoq siunnersuuteqartoq ATASSUT-mit isumaqatigaarput.

 

Taamaattumik Naalakkersuisut ulloq unnuarlu meeqqanut inuusuttuaqqanullu angerlarsimaffiit allilerneqarnerisigut aaqqiiniutissatut akissuteqaamminni taakkartugaat ATASSUT-mit ilassilluaraluarlugit illuatungaani Naalakkersuisut taanna aaqqiiniutissatuatut isumalluusiussimammassuk ATASSUT-mit naammagisimaanngeqaarput.

 

Ajornartorsiutimmi taama ilungersunartigisup qaangerniarnissaanut ulloq unnuarlu angerlarsimaffiit qassiuneri qassinik issimasoqarsinnaanerilu kisimi aqqutissaanngitsoq ATASSUT-mit isumaqarluinnarpugut.

 

Illuatungaaniliuna iliuuserineqartut pitsaassutsimikkut, isumaliutigilluagaassutsimikkut  aammalu aalaakkaassutsimikkut qulakkeerinnissutaasussat inuiaqatigiinni meerartatta inuusuttortattalu inuttut sequminneqartigatik toqqissisimallutik inuusinnaanissaannut.

 

Taamaattumik Naalakkersuisut nunatsinni kommuninut pasilliinerpalaartumik pissuseqarlutik, allaat meeqqat inuusuttullu angerlarsimaffimminnit piaarnerpaamik qimagutsinneqartariaqartut kommunit ilisimagaluarlugit siunnersuutigineqartoq manna atulissagaluarpat iliuuseqarnaveersaartalernissaannik ilimaginerarlugit itigartitseqqusinermut patsisilersornerat arlaannaatigulluunniit akuersaarneqarsinnaanngilaq!

 

Soorunami inatsisitigut piumasaqaatinnguisoqarneratigut meeqqat inuusuttullu sumiginnakkat piaarnerpaamik angerlarsimaffiup avataanut inissinneqarnissaat pillugu qanorpiaq sinaakkutissaqartinneqassanersoq Namminersornerullutik Oqartussat kommunillu isumaqatigiissusiornikkut naammassiniassavaat, qulakkeerlugulu kommunit pinngitsaaliissummik arsaarinninnissamik toqqaasariaqartillugit aningaasartornissamut tunngasut uniffigineqartannginnissaat.

 

Naggasiitigata ATASSUT-mit erseqqissaatigissavarput pingaartilluinnaratsigu meeqqat inuusuttullu angerlarsimaffimminnit qimagutsinneqartariaqartarnerat aaqqiissutissap naggatissarinngimmagu, siunertarineqartuaannassaarmi meeqqat angerlarsimaffimminnut utersinnaanissaat, taamaattumik siunnersuut manna suliassat ilaminiinnannguaraat pisariaqarluinnartorli.

 

Meeqqamut angajoqqaanut qatanngutaasunut ilaqutaasunullu arsaagaaneq inuunermi nalaanneqarsinnaasut alianarnerpaat ilagigaat meeqqamullu qamuuna katattusaanngitsumik ikiliisartoq ATASSUT-mit qularutiginngilarput, taamaammat ilaqutariit inuuniarnermikkut ajornartorsiungaartut meeqqamik arsaaginnarneqassanngillat, aammali ikiorneqartariaqarput ilaqutariittut toqqissisimanartumik inuuneqaleqqissinnaanngorsarlugit.

 

Taamatut oqaaseqarluta ATASSUT-mit siunnersuut akuersaarparput, inassutigissavarpullu suliap aappassaaneerneqannginnerani Inatsisartut Ilaqutariinnermut Peqqissutsimullu Ataatsimiititaliami suliarineqassasoq.