Samling
Dansk tekst mangler
|
Anthon Frederiksen Uka- 2004-150/01 |
ulloq, 26 oktober 2004 |
Aalisarnermut Siunnersuisoqatigiit aamma Piniarnermut Siunnersuisoqatigiit atorunnaarsillugit kattuffiit allakkatigut tusarniaavigineqartalernissaat eqqunneqarsinnaaqqullugu piniarneq aallaaniarnerlu pillugit Inatsisartut inatsisaaata aamma aalisarneq pillugu Inatsisartut inatsisaata allanngortinneqarnissaannik Naalakkersuisut peqquneqarnissaat pillugu Inatsisartut aalajangiiffigisassaattut inatsisartunut ilaasortap Palle Christiansen-ip siunnersuutata siullermeerneqarnera
Kattusseqatigiit sinnerlugit imaattumik oqaaseqarfigissuara:
Siullermik erseqqissaassutigissuara; Kattusseqatigiinni pingaartitatta angisuut ilagimmassuk inatsisiliornermi atuisut aammalu susassaqartut assigiinngitsut tusarniaaffigineqartarnerisa pitsaanerpaami inissisimatinneqarnissaat, taamaattumik demokrati-niit Palle Christiansen-ip siunnersuutaa akuersaarsinnaanngilarput, tassa Kattusseqatigiinni anguniakkatta ilaannut aamma pingaartunut naapertuutinngimmat.
Tassami Kattusseqatigiinni anguniakkatta pingaartut ilagaat; inatsisiliornermi sapinngisamik innuttaasut, minnerunngitsumillu inatsimmi pineqartut susassaqarfii annertunerpaamik tusarniaaffigineqarlutillu isumasiorneqartarnissaat, taamaaliornikkut isumaqaratta inatsisit peqqussutillu pissutsinut piviusunut naapertuunnerusut aammalu inuuttaasunut atortikkuminarnerusut pilersinneqarsinnaasut.
Taamaakkaluartoq Kattusseqatigiinni aamma pingaartipparput siunnersuisooqatigiit Naalakkersuisunit pilersinneqartartut sapinngisamik siammasissumik inuttalersungaanermikkut susassaqartunit tamanit peqataaffigineqarnissaat sapinngisamik illuinnaasiunngitsumik aalajangiisarnissaq anguniarlugu tamanna piviusunngortinneqartariaqartoq aamma Kattusseqatigiinniit siusinnerusukkulli inimi maani tamanna piumasaaqaatigisareerparput, taamaammat aalisarnermut siunnersuisoqatigiit aamma minnerpaamik SIK-miit peqataaffigineqarnissaat inassutingaarput.
Taamatut oqaaseqarlunga Siunnersuisoqatigiit pioreersut inuttalersungaanermikkut nalilersuiffigineqarnisaat inassutingaara.