Inatsisartut Allattoqarfiat nutserisumik / oqalutsimik ulloq 01. december 2026-mi isumaqatigiissuteqarnikkulluunniit atorfinittussarsiorpoq
Naalakkersuinermik suliallit aalajangiisarfianni ‘pisut qeqqanni’ ulapaarfiusumi peqataarusuppit?
Suliassanut pikkunarsinnaasunut kajumissuseqaruit piffissarlu annikitsoq atorlugu pitsaasumik naammassinnissinnaaneq ilinniarusukkukku, taava immaqa suleqatissarput illiuvoq.
Inatsisartut Allattoqarfiat pillugu
Inatsisartut Allattoqarfiat oqaluttaanermik nutserisuunermillu, allattaanermik, kiffartuussinermik, naatsorsuuserinermik qarasaasialerinermillu suliaqartunik sulisoqarpoq, taakkununngalu ilaapput Inatsisartut ataatsimiititaliaannut ataavartunut siunnersuinermik allattaanermillu suliaqartut.
Inatsisartunut ilaasortat, ataatsimiititaliat, Inatsisartut Siulittaasoqarfiata, Folketingip, nunat avannarliit allat inatsisartuisa, Nunat Avannarliit Siunnersuisoqatigiiffiata aammalu Nunat Avannarliit Killiit Siunnersuisoqatigiiffiata attaveqarfigineqartarnerat Inatsisartut Allattoqarfiata allattoqarfittut isumagisaraa kiisalu suliassat Kalaallit Nunaanni Inatsisartunut attuumassuteqartut assigiinngitsorpassuit isumagisaralugit.
Nutserisut/oqalutsit pillugit
Inatsisartut Allattoqarfianni nutserisoqarfik nutserisunik/oqalutsinik arfineq marlunnik inuttaqartussaavoq.
Nutserisumik/oqalutsimik ataatsimik ulloq 01. december 2026 isumaqatigiissuteqarnikkulluunniit atorfinittussarsiornitsinni
Naatsorsuutigaarput:
- Kalaallisut danskisullu piginnaaneqarluartuunissat
- Ulapaarfinni uippalliasuunnginnissat pisariaqassasoq
- Qiimasuunissat, ineriartortitseqataarusullutillu piumassuseqarluartuunissat
- Tuluttut oqaaseqarlutillu allassinnaaguit iluaqutaassaaq, piumasaqaataanngilarli
Naatsorsuutigissavat:
- Immikkuullarissunik paasisimasaqarfigiligassanni inissisimaffeqalernissat
- Nunatsinni avataanilu Inatsisartut ataatsimiititaliaat peqatigalugit atorfimmut atatillugu angalasarnissat
- Ukiumut marloriaq (ukiumut sap. ak. 20-t tikillugit) Inatsisartut ataatsimiinneranni suliassat nalinginnaasumit amerlanerusarneri
- Inuit tunniusimasut, suliumassuseqarluartut ataatsimuullaqqissullu suleqatigilissallugit
- Suliffeqarfik ilisimasanik avitseqatigiinnermik pingaartitsisoq
Attavissaq
Atorfiup imarisai suliassallu suunerinik paasissutissat Naja Rosing Ludvigsenimut oqarasuaat +299 34 61 16-mut imaluunniit +299 52 23 41-mut saaffiginninnikkut pissarsiarineqarsinnaapput.
Atorfinitsitsineq
Atorfinitsitsineq Namminersorlutik Oqartussani kommuninilu atorfillit pillugit Naalakkersuisut AK-llu akornanni isumaqatigiissut naapertorlugu pissaaq.
Ineqarneq
Malittarisassat atuuttut naapertorlugit akilerneqartussamik ineqartitsisoqarsinnaavoq. Isumaqatigiissutit atuuttut naapertorlugit pigisat nuunneqarnerat akilerneqarsinnaavoq. Nuummili inissaaleqinerujussuaq pissutigalugu inissamik tunineqarnissap tungaanut utaqqingaatsiarnissaq naatsorsuutigineqarsinnaavoq.
Atorfimmut qinnuteqarneq
Qinnuteqaat soraarummersimanermut uppernarsaatitalik siornatigullu suliffigisimasanik paasissutissartalik ilanngullugu uunga nassiunneqassaaq:
Inatsisartut Allattoqarfiat
Postbox 1060, 3900 Nuuk
E-mail: atorfik@ina.alla.gl
Qinnuteqaat Inatsisartut Allattoqarfiannit kingusinnerpaamik ulloq 30. november 2026-mi allakkatigut mailikkulluunniit tiguneqareersimasussanngorlugu nassiunneqassaaq.