Samling

Ulloq 11. januar  2006 VM 2006/17

 

Nunatta Karsiata 2004-mut Naatsorsuutaasa akuerineqarnissaannik siunnersuut

(Aningaasanut nunanullu allanut Naalakkersuisoq)

 

Saqqummiussissut.

 

Matumuuna Nunatta Karsiata ukiumut aningaasanut inatsiseqarfiusumut 2004-mut Naatsorsuutai naalakkersuisut sinnerlugit saqqummiutissavakka.

 

2005-imi upernaakkut Inatsisartuusimasut ataatsimiinneranni Naatsorsuutit imm. 27-tut saqqummiunneqarput.

 

Naatsorsuutit 2005-imi upernaakkut ataatsimiinnermi Kukkunersiuinermut Ataatsimiititaliami suliassatut tunniunneqarput, taamatullu kukkunersiuinermut nalunaarusiamik avataanit kukkunersiuisunit suliarineqarsimasumik tigusaqarpoq. Kukkunersiuinermut Ataatsimiititaliaq nalunaarusiami kaammattuutinut oqaaseqaatinullu allakkatigut akissuteqaatinik naalakkersuisunut kutsiorpoq. Kukkunersiuinermut ataatsimiititaliaq qinersinissamik nalunaaruteqarneq sioqqullugu isumaliutissiissummik angumeqqussinngitsoorpoq.

 

Qinersinerup kinguneraa aalajangernissamut siunnersuutip atorunnaarnera, taamaammallu 2006-imi Inatsisartut ukiuunerani ataatsimiinneranni saqqummiuteqqinneqaqqittariaqalerpoq. 

 

Nunatta karsiata Naatsorsuutai 2004-mi ineriartornermut nalinginnaasumut naapertuupput.

 

Nunatta Karsia 2004-mi 159 mio. kr.-inik sinneqartooruteqarpoq, sinneqartoorutissat ilassutitut aningaasaliissutit ilanngullugit 7 mio. kr.-inut missingersuusiorneqarsimagaluartut. Taamaalilluni angusat missingersuusiarineqartunit 152 mio. kr.-inik pitsaanerupput.

 

Angusat pitsanngoriaataannut pissutaasoq pingaarnerpaaq tassaavoq utoqqalinermi soraarnerussutisiani, siusinaartumik soraarnerussutisiani ineqarnermullu tapiissutini katillugit 50 mio. kr.-inik atuinikinnerusoqarsimanera. 2005-imut aningaasanut inatsimmi missingersuusiorneq Naalakkersuisut appasinnerutissimavaat missingersuusiornerlu 2006-imut aningaasanut inatsisissatut siunnersuummi naleqqussaqqinniarparput, taamaalilluta piviusorsiornerusumik missingersuuteqarumalluta.

 

2004-mut aningaasanut inatsimmi 2005-imi utoqqalinermi soraarnerussutisianut aningaasartuutissat 252,5 mio. kr.-iusussatut missingersuusiorpagut. 2005-imut aningaasanut inatsimmi taakku naatsorsuutigineqartut 230 mio. kr.-inut appartinneqarput. Tassa 22,5 mio. kr.-inik appartinneqarlutik. Tamatuma saniatigut ineqarnermut tapiissutinut aningaasaliissutit 5 mio. kr.-inik appartippavut.

 

Kontut taakku mianersortumik missingersuusiorneqarlutik aningaasaliivigineqarsimapput aningaasartuutit missingersornissaannut eqqortumik tunngavissaqarsimannginnerput pissutigalugu. Taamatuttaaq utoqqalinermi soraarnerussutisiallit saniatigut isertitaat kiisalu soraarnerussutisiaqarsinnaalernissamut ukiussarititaasut 60-init 63-imut qaffanneqarnerisa sunniuteqariartornerat apeqqutaaqataasimapput.

 

Kisitsisitigut tunngavissat pitsanngoriartuinnarput. Tamanna aamma 2006-imut aningaasanut inatsisissamut piareersaanitsinni aningaasartuutissatut naatsorsuutigisatsinnik missingersuutinullu erseqqissaanerusinnaanitsinnut tunngaviuvoq.

 

Ingerlatsinermut aningaasartuutini, taakkununnga ilanngullugit allaffissornermi, ilaqutariinnermut peqqissutsimullu tunngasuni kiisalu ilinniartitaanermut tunngasuni 44 mio. kr.-inik atuinikinnerusoqarsimavoq.

 

Pitsaanerusumik angusaqarnermut pissutaasut pingaarutillit pingajoraat sanaartornermut tunngasuni 28 mio. kr.-nik atugassanngortinneqanngitsunik suliassanut aalajangersimasunut immikkoortitsisoqarsimanera. Taamaattumik aningaasat taakku ukiup naanerani sanaartugassanut iluarsagassanullu aningaasaateqarfimmut nuunneqarsimanngillat.

 

Pissutaasut sisamaraat sillimmatit ilaasa, assersuutigalugu ingerlatsinermut sillimmatit tamakkiisumik atorneqarsimannginnerat.

 

Akerlianik akitsuutinut tunngasuni isertitakinnerusoqarpoq, tamatumani immiaaqqanik, viinninik imigassanillu pingaartumillu tupanik eqqussuinermut akitsuutit naatsorsuutigisamit 21 mio. kr.-inik ikinnerusimallutik. Tamanna soorunami nunatta karsianut annaasaqaataavoq inuilli peqqissuunissaannut pitsaasuulluni.

 

Sanaartornermut tunngasuni 2004-mi sanaartornermi sulianut 574 mio. kr.-inik akiliisoqarsimavoq. Tamanna 2003-mi qaffasissutsimut naapertuuppoq. Ukiup naatsorsuusiorfiusup 2004-p naanerani sanaartugassanut iluarsagassanullu aningaasaateqarfimmiittuutit 684 mio. kr.-iupput.

 

Ineqarnermut Attaveqaqatigiinnermullu Naalakkersuisoq sanaartugassanut iluarsagassanullu ukiut tamaasa nassuiaasiortarpoq, tassani pineqarluni ingerlatat erseqqissumik nassuiarneqarnerat. Sanaartorneq pillugu 2004-mut nassuiaat Inatsisartut upernaakkut 2005-imi ataatsimiinneranni immikkoortutut 36-tut oqaluuserineqarpoq.

 

2004-mut naatsorsuutit Namminersornerullutik Oqartussat avataanit kukkunersiuisuannit uparuaanertaqanngitsumik naliliiffigineqarput ilassutitut tikuartuussivigineqanngitsumik, tassa isornartoqanngitsutut isigineqarlutik. Imaappoq kukkunermik uparuarneqarsinnaasumik amigaatinillu nassaartoqarsimanngitsoq kiisalu naatsorsuutit eqqortuusutut isigineqartut.

 

Kukkunersiuinermut Ataatsimiititaliaq avataanit kukkunersiuisunit kukkunersiuinermi nalunaarusiamik tigusaqarpoq.

 

Maanna kukkunersiuinermut ataatsimiititaliaq 2004-mut naatsorsuutinik kiisalu kukkunersiuinermi nalunaarusiamik naalakkersuisullu tassunga akissutaannik suliarinnisaaq. Tassanngalu kukkunersiuinermut ataatsimiititaliaq isumaliutissiissaaq Inatsisartuni oqaluuserineqartussamik.

 

Tamanna pillugu kukkunersiuinermut ataatsimiititaliap isummersoqatigilluanissaa naalakkersuisut qilanaaraat.

 

Taamatut oqaaseqarlunga naalakkersuisut sinnerlugit Nunatta Karsiata 2004-mut Naatsorsuutai Inatsisartunut kukkunersiuinermullu ataatsimiititaliamut suliassanngorlugit saqqummiuppakka.