Samling
UPA 2006/3
27. April 2006
Ane Hansen
Inatsisartut Ombudsmandiata ukiumoortumik 2004-imut nalunaarutaa.
(Inatsisartut Inatsisit atortinneqarnerannut Ataatsimiititaliaani ilaasortat)
Inatsisartut Ombudsmandiata pilersinneqarneraniit 2004-mi nalunaarutit 10-lissaat Inatsisartunut saqqummiunneqarmat Inuit Ataqatigiinnit ima oqaaseqarfigissuarput.
Inatsisartut Ombudsmandiata pilersinneqarnerata kingorna nalunaarusiat 10-lingat saqqummiunneqarmat Inuit Ataqatigiinniit pissusissamisoortipparput innuttaasut Inatsisartullu Ombudsmandiata sullissinerata inuit qinigaattut sulinitsinnut qanoq pingaaruteqartiginera aammalu qinikkatut sulinitsinni qanoq atortarneripput oqaaseqarfigilaassallugu.
Inuit Ataqatigiit pingaruteqarluinnartutut isigaarput nunat inuinnaat oqartussaaqataanerannik pingaartitsillutik ingerlatsiviusut tamarmik aamma inuit oqartussaaqataanerannik illersuiffiusinnaasumik nakkutilliivimmik saaffissaqartariaqarnerat, tamatumani innuttaasut Inatsisartut Ombudsmandiat pingaarutilerujussuarmik inissisimasutut oqaatigisariaqarpoq.
Naalakkersuinermi inatsisinillu atortitsisunik nakkutilliinermut Inatsisartut Ombudmanderput atorparput, pingaarnerpaamillu inuttaasut inatsisitigut illersugaanerannik inatsisillu eqqortumik atortinneqarnerannik qularnaarinnittussaavoq. Taamaattumik aamma Inatsisartut Ombudsmanderput innuttaasut pisortanit sullinneqarnerminni pisinnaatitaaffiinut illersuiffiuvoq pingaaruteqartutut taasariaqartoq.
Inatsisartut Ombudsmandiata ukiumoortumik nalunaarutaasigut takusinnaasarparput paasisaqarfigisarlutigulu Inatsisit sorliit nutartertariaqalersimanersut, suut naleqqussarneqartariaqalersimanersut, aammalu suut innuttaasut akornanni iluarsaattariaqalersimanersutut isigineqarnersut.
Aamma ingasattajaarnerussagunanngilaq oqassalluni Inatsisartut Ombudsmandiat innuttaasut akornanni nunasiataasimanitta kingorna inuiaat akornanni oqartussaaqataanerup nukittorsarfiattut aqqutaalluartuusoq.
Qularutissaangilaq aamma manna Namminersornerullutik Oqartussat Kommunillu akornanni oqartussaaffinnik iluarsaaqqinnermi ajornartorsiutit nalunaarusiat aqqutigalugit tikkuarneqartartut isumassarsiorfittut iluaqutigineqarluarsinnaasut.
Taamatut naattumik oqaaseqarluta Inatsisartut Ombudmandeqarfiat ukiuni qulinngortorsiorsimanerannik pilluaqquarput, aammalu Ombudsmanderput suleqataalu tamaasa pisarnermisut sulilluarsimaqimmata qutsavigaagut, aammalu suli ukiorpassuarni sulilluarnissassinnik kissaappassi.
Nalunaarusiaq tusaatissatut tiguarput sulinitsinnilu iluaqutigillarumaarparpunaasiit.