Samling
ATASSUT UPA 2006/48
Augusta Salling 25. april 2006
Inatsisartuni Naalakkersuisunilu il.il. ilaasortat aningaasarsiaqartitaanerat il.il. pillugit Inatsisartut inatsisaata allanngortinneqarneranik Inatsisartut inatsisaattut siunnersuut.
(Ilassinninnermut aningaasartuutit akilerneqartarnerat)
(Inatsisartuni ilaasortaq Per Berthelsen, Demokratit)
Siullermeernera
Naalakkersuisuni ilaasortat taamatullu Inatsisartut siulittaasuata ilassinninnermut aningaasartuutigisartagaat pillugu sukaterinissamik pisariaqartitsisoqarneranik aallaaveqartumik Inatsisartuni ilaasortap Per Berthelsen-ip siunnersuutaa ATASSUT-mit imatut naatsumik oqaaseqarfigissavarput:
Tamatsinnut nuanniillunilu tujorminarsimaqaaq Naalakkersuisuni ilaasortaasimasut ilassinninnermut eqqunngitsumik naapertuutinngitsumillu nunatta karsianut, taamaalillunilu inuiaqatigiinnut aningaasartuuteqartitsisimanerat. Tamattalu ilisimavarput pisimasut politimesterimit misissuiffigineqarmata, ATASSUT-millu naatsorsuutigilluinnarparput misissuinerit eqqortumik naammassineqarumaartut.
Ilassinninnermut aningaasartuutit, angalanermut aningaasartuutit aningaasartuutinullu allanut aningaasaliissutit eqqortumik atorneqartarnissaat pillugu Naalakkersuisut najoqqutassanik ersarissunik atuutilersitsereernikuusut ATASSUT-mit ilisimavarput, isumaqarpugullu aningaasaliissutit atorneqartarnissaat pillugu ersarissumik najoqqutassiorsimaneq naammaginartoq, taamatumillu Inatsisartuni Naalakkersuisunilu il.il. ilaasortat aningaasarsiaqartitaanerat il.il. pillugit Inatsisartut inatsisaata allanngortinneqarneranik Inatsisartut inatsisaattut siunnersuut manna tapersernianngilarput.