Samling
ATASSUT
Postboks 399
3900 Nuuk
Tlf: +299 32 33 66
+299 34 50 00
+299 34 62 53
Fax: +299 32 58 40
ATASSUT UPA 2006/83
Ellen Christoffersen 11. maj 2006
Aalisakkanik assigiinngitsunik aalisarsinnaanissamut oqallisissiartut siunnersuut.
(Inatsisartuni ilaasortat: Augusta Salling, Ellen Christoffersen, Godmand Rasmussen, Thomas Kristensen, Kristian Jeremiassen, ATASSUT)
Aalisakkanik assigiinngitsunik aalisarsinnaanermut periarfissat pillugit apeqquteqaat aallaavigalugu oqallisissiatsinnut matumunnga ATASSUT-mit imaattunik oqaaseqaateqassaagut:
Nunarsuaq tamakkerlugu silaannaap allanngoriartornerata, annertuumik immap pisuussutaanut uumassusilinnut sunniuteqartup sunniuteqartussallu, malitsigisaanik nunatsinni aalisarnermik inuussutissarsiuteqarnermut piffiit nutaat atuutilertussaasut ATASSUT-mit qularutiginngilarput. Taamaammat isumarput naapertorlugu pisariaqarluinnarpoq tamatta piffinnut nutaanut isummersoqatigiittuartariaqarpugut.
Pisummi isiginnaaginnarutsigit, taamaalillutalu naapitassagut unamminartut isiginngitsuusaaginnarlugit, tamanna aalisarnermik inuussutissarsiuteqartortatsinnut naggataatigullumi nunatta karsianut annikigisassaanngitsumik aningaasarsiornikkut kingunipiloqarsinnaavoq. Taamaammanuna aalisarnermik inuussutissarsiuteqartortatta piffinnut nutaanut naleqqussarsinnaanissaannut sinaakkusersuinissarput pisariaqartoq.
Peqassuseq pillugu nalilersuisarnerit isumannaatsumik ingerlanneqarsinnaajuaannarneq ajorput, taamaammallu ataatsimut isigalugu oqartoqarsinnaavoq pisassat pillugit siunnersuutit uumasulerituuneersut ullumikkut siunissamilu qularnaatsuujuaannanngitsut ilisimaneqarpoq. Taamaattorli imartatta kissatsikkiartornera piviusuummat isummersoqatigiittariaqarpugut, tassami tamatuma nassataanik aalisakkat, pingaartumik saarulliit, amerlasoorsuanngorlutik takkussinnaanerat ilimanaateqarluinnartutut nalilerneqartariaqarpoq, taamatuttaaq aalisakkat imarmiullu allat imartatsinni ullumikkut takkusimaarneq ajortut siunissami takussaalersinnaanerat eqqarsaatitsinniittariaqarpoq.
Saarullinniarnissamut sillimalluarutta, saarulliillu inuussutissarsiutigineqarsinnaallutik takkuteqqissappata, tamanna ajunngilluinnassaaq. Taamaattorli aamma raajarniarnermut ajorseriaateqartitsinissaa sillimaffigineqartariaqarpoq, tassami saarulleqarluarfinni raajat ikilisarnerat ilisimaneqarpoq.
Taamaattuminguna siunissami aalisarnerup periarfissaritiligasssai massakkut oqallisigalugillu isummersorfigisariaqarivut, uagullu ATASSUT-mit ilisimavarput Aalisarneq pillugu Siunnersuisoqatigiit innersuussuteqarnikuusut aalisakkanik assigiinngitsunik aalisarsinnaanermut periarfissat annertusarneqaqqullugit, tamannalu sinerissamut qanittumi aammalu avataani aalisarsinnaanermut tunngatinneqarpoq.
Sinerissamut qanittumi qaleralinniarnermut tunngatillugu aalisarnermik inuussutissarsiuteqartortatta inatsisitigut periarfissat annertusarneqarnissaannik, tassa angallat ataasiinnaq atoraluarlugu nikerartitsisinnaallutik raajarniarsinnaanermik qaleralinniarsinnaanermillu ujatuinerat, taamatuttaaq avataasiorluni qaleralinniarsinnaatitaanermut pisassiissutinut atatillugu assigiinngitsunik aalisarsinnaanissaminnut ujartuinerat matumani assersuutitut taassavarput.
Naak massa Naalakkersuisut akissuteqaamminni erseqqissaatigigaluaraat assigiinngitsunik aalisarsinnaanissamut inatsisitigut akimmiffissaqanngitsoq, ATASSUT-mit isumaqarpugut ullumikkut pisassissarneq siunissamilu pisassiisalerumaarneq pillugit qanoq politikkikkut siunnerfeqartoqarnersoq aalisarnermik inuussutissarsiuteqartortatta ilimagisinnaannik tikkuussinissaq amigaataasoq, tamannalu soorunami kinguneqarpoq aalisarnermik inuussutissarsiutillit angallataatiminnik assigiinngitsunik aalisarsinnaalerumaarnerminnut naleqqussaajuminaatsitsinerannik.
ATASSUT-mit isumaqarluinnarpugut aalisariutaatilittagut siunissami, ullumikkumit annerungaartumik, piffissamut naleqquttumik aalisarnermik ingerlatsisinnaanissaminnut periarfissaqartariaqartut aammalu suliffissuaqarnerup/pisisartut kissaatigisaannik aalisarsinnaanissaminnut periarfissinneqartariaqartut, tamatumalu pisussaaffilerpaatigut aalisarnermik inuussutissarsiuteqartortatta nukittullutik unammillersinnaassuseqarnissaannut sinaakkutassanik isumannaarinnittariaqarnitsinnik.
Taamaammanuna aalisakkanik assigiinngitsunik aalisarsinnaanermut periarfissat annertusarrneqarnissaat matumani ATASSUT-mit ujartuisugut, tassami aalisakkanik assigiinngitsunik aalisarsinnaanermut nikerartitsisinnaaneq ammaanneqarpat, qularnaatsumik aalisarnermik inuussutissarsiutilittatsinnut aningaasarsiornikkut annertuumik kivitseqataassaaq. Aalisarnermik inuussutissarsiuteqartut ajornannginnerusumik aalisarnerminni sapinngisamik annertunerpaamik aningaasarsiorsinnaalissapput, soorunami aningaasarsiornissamik ilimasunneq aammalu aalisakkanik assigiinngitsunik aalisarnermi aalisakkat akii aalisarnernilu taakkunani aningaasartuutissat matussuserneqarnissaat eqqarsaatigineqassapput. Tamakku aallaavigalugit naatsorsuutigineqassaaq inuussutissarsiornermit tassannga aningaasat nunatta karsianut isaasussat amerlanerulissasut, peqatigalugulu aalisartut aalisakkanilu suliffissuarni sulisut suliffissaat qularnaannerulissapput.
Qujanaq!