Samling

SIUMUT INATSISARTUNI ILAASORTAATITAT / LANDSTINGSGRUPPEN

                                                                                                                                                

28. april 2006                                                                                                          UPA 2006/51/44-1

   

Annertuumik innarluutillit ikiorserneqartarnerat pillugu Inatsisartut peqqussutaannut nr. 7-mut 3. november 1994-meersumut allannguutissatut siunnersuummik Naalakkersuisut saqqummiusseqqullugit peqquneqarnissaannik Inatsisartut aalajangiivigisassaattut siunner-suut, taamaalilluni § 9-mi, imm. 2-mi akissarsiat amerlassusiat naleqqussarneqassammat, taamaalillunilu manna tikillugu taamatut amerlanerulersitsineq pisartagaqartup ilinniarti-taaneranut isertitaqartarneranullu naapertuuttunngorluni.

(Inatsisartuni ilaasortaq Jens B. Frederiksen, Demokraatit)

 

Innarluutilinni atugassarititaasut allat assigalugit inuiaqatigiinni naligiimmik atugaqalernis-saat kiisalu innarluutilinnut ilisimasanik katersuiffimmik pilersitsisoqarnissaanut periarfis-sat qulakkeerniarlugit Naalakkersuisut politikkikkut anguniagaat suunersut pillugit apeq-quteqaat aallaavigalugu oqallinnissamik siunnersuut.

(Inatsisartuni ilaasortaq Ruth Heilmann, Siumut)

   

Siullermeerinninneq

   

Inatsisartuni ilaasortat Jens B. Frederiksen-p aaliangiiffigisassatut siunnersuutaa aammalu Ruth Heilmann-p apeqquteqaat aallaavigalugu oqallissaarutaa kiisalu Naalakkersuisut akissutaat Siumup inatsisartuni gruppianiit imaattumik oqaaseqarfigissavagut.

 

Siullermik erseqqissaassutigissavarput Siumup pingaartitarilluinnarmagu Nunatsinni innorluutillit innarluuteqalersimasullu atugarisaasa periarfissaasalu toqqissisimanartumillu inuiaqatigiinni nali-giittut inuuneqarnissaat pitsanngorsartuarnissaat naleqqussartuarnissaallu qulakkeerniarmassuk. Soorluttaaq aamma tamanna Naalakkersuisooqatigiit isumaqatigiissutaanni ukiut tulliuttut ingerla-nerini inuit atugarisaannut ilaatillugu innorluutillit innarluuteqalersimasullu pitsanngorsaavi-giniarlugit isummiussaanni isumaqatigiissummi allaqqasut.

Tamanna tamakkiisumik tapersersorlugulu peqataaffigissagatsigu oqaatigissavarput.

 

1990-kkut naalernerani innarluutillit annertuumillu innarluuteqarnertik peqqutigalugu nunatsinni paaqqutarineqarsinnaasimanngitsut qallunaat nunaanni sivisunerusumik sivikinnerusumilluunniit inissinneqarsimasut pillugit pineqartunut akisussaassusilimmik angerlarartitsinissamik politik-kikkut aaliangertoqarmat Siumut siuttuusimavoq.

 

Qularutissaanngilaq Inatsisartuni aaliangerneq inuiaqatigiinnut tamanut minnerunngitsumik ilaqutaasunut toqqissiallannermik minnerunngitsumillu akisussaaffimmik tiguserusunnermik ersersitsisimasoq.

Taamaattumik aamma Siumumiit pingaartilluinnarput innorluutillit innarluuteqalersimasullu inuiaqatigiinni sapinngisamik nalinginnaanerpaamillu akuutinneqarnissaat qulakkeerniarlugu ersarissumik politikkeqarfiginissaa.

 

Taamatulli annertuumik Naalakkersuinikkut alloriarlutalu kivitsinitsinni miserratigisassaanngilaq suli arlalitsigut innorluutilinnut inarluuteqalersimasullu pitsaasumik siunertaqarluta politikkikkut tusiapiffeqaratta aaqqittariaqakkatsinnik, politikkikkut aammali ilaqutariit ataasiakkaat akunnitsinni.  

 

Aaqqitassalli annertunersaat politikkikkut iliuuseqarfissaasut ersersitsinerat takussutissaqar-titsinerallu Inatsisartuni ilaasortat Ruth Heilmann-p kiisalu Jens B. Frederiksen-mit saqqummi-unneqartut naqissusiipput, soorluttaaq Ilaqutariinnermut Inatsisinillu Atortitsinermut Naalak-kersuisup Aleqa Hammond-p akissutaani tusaaneqarsinnaasoq. Naalakkersuisumit akissuti-gineqartut Siumumiit iluarisimaarpavut, siunissamut piffissamilu qaninnermi aaqqiissutissanik innorluutilinnut innarluuteqalersimasunullu isumalluarnissamik pissutissaqartitsimmata.

 

Taamaattumik Siumumiit qularutiginngilarput Naalakkersuisut Innarluutillit atugaat pillugit ikioq 2007 atorlugu inatsisitigut naleqqussaanissat kiisalu innarluutilinnut atugassarititaasut minne-runngitsumillu innarluutilinnik sullissinermi akissaatinut tunngasut annertuumik politikkikkut minnerunngitsumilu pineqartunit ersarissumik isummersorfigineqarluarumaartut.

 

Ilaqutariinnermut Inatsisinullu Naalakkersuisup Aleqa Hammond-p Jens B. Frederiksen Demokraatineersumut akissuteqarnermini ersarissumik tunngavilersuutai Siumumiit tamakkii-sumik taperseratsigit oqaatigissavarput.

 

Inatsisartuni ilaasortap Ruth Heilmann Siumumeersup apeqquteqaat aallavigalugu oqallisissiaani Innarluutilinnut ilisimasanik katersuiffimmik pilersitsisoqarsinnaaneranik oqallisissiaqarnera soqutigalugu Siumumiit isummersorfigaarput soqutiginartutut isumaqarfigalugu. Politikkikkummi sulinermi isummersortarnernilu minnerunngitsumillu aaliangersaasarnerni pinngitsoorneqarsin-naanngillat ilisimasat eqqortut aallaavigalugit isummersortarnissaq, soorluttaaq tamanna meeq-qanut inuusuttuaqqanullu tunngatillugu politikkikkut pingaartinneqarluni piviusunngortinne-qarsimasoq.

 

Kiisalu Ruth Heilmann-p oqallisissiaata aappaa tassalu innorluutilinnut innarluutilinnullu ersarissumik politikkeqalernissamik ujartuinera Siumumiit isumaqatigigatsigu oqaatigissavarput. Tamannami politikkikkut sulinermi naleqqatut sakkussatullu sulinermi toqqammavissatut naleqqussaajuarnissami minnerunngitsumilu innorluutillit innarluuteqalersimasullu atugarisaannut qulakkeerinnittutut nalilertariaqarmat, soorlu tamannattaaq aamma innarluutillit kattuffiannit siusinnerusukkulli ujartorneqartarsimasoq.

 

Taamatut Siumumiit oqaaseqarluta Ruth Heilmann-p apeqquteqaat aallaavigalugu oqallisissiaai isummersorfigaavut kiisalu Jens B. Frederiksen-p aaliangiiffigisassatut siunnersuuta aappassaaneerneqartinnagu Ilaqutariinnermut ataatsimiititaliami nalilersorneqarnissaa innersuus-sutigissavarput.

  

Tommy Marø

Siumut