Samling
Dansk ordførerindlæg mangler
UPA 2004/17
30. April 2004
2003-mi ilassutitut aningaasaliissutinut Inatsisartut inatsisissaattut siunnersuut.
(Aningaasanut Nunanullu Allanut Naalakkersuisoq)
Siumumit Naalakkersuisut 2003-mut Inatsisartut ilassutitut aningaasaliissutinut inatsisissaattut siunnersuut kingumoortumik aningaasaliissutinut siunnersuutaasoq
paasinarluarmat, Siumumit taamatut Naalakkersuisut saqqummiussaqarnerat qujassutigaarput.
Aningaasanut inatsisip atuuffiata ingerlanerani nutaamik aningaasaliissutigineqartut
oqaasertaliussanilluunniit Naalakkersuisunit piffissaagallartillugu allannguuteqartitsinissamik piumasaqaataasut nalinginnaasumik Inatsisartut Aningaasaqarnermut Ataatsimiititaliaanut isummerfigineqareerlutik akuersaarneqartut Inatsisartut ilassutitut aningaasaliissutinut inatsisaannut ilanngunneqartarput, inatsisartullu ataatsimiinneranni siullermi inatsisartuni oqaaseqarfigisassanngorlugit saqqummiunneqartussaallutik.
Taamatullu tamanna maanna pilluni inatsisartunut saqqummiunneqarpoq. Immikkut iluarsiissutaasut uani oqaaseqarnitsinni ilanngutissallugit Siumumit pissutissaqarsorinngilarput, taakkumi nalinginnarmik ersarissumik siunnersuummi takuneqarsinnaareermata.
Aammalu aningaasartuutini isertut anisullu oqimaaqatigiissumik ingerlanerat malinneqarsimammat, sinneqartoorutaasussatullu naatsorsuutaareersut aalajangiusimaannarlugit nikisinneqanngimmata.
Naalakkersuisut naggataagut saqqummiinerminni oqaatigaat Namminersornerullutik Oqartussani suli paasiuminarnerusumik nittartakkap www.Nanoq.gl-kkut ilassutitut aningaasaliissutit akuersissutigineqarnikut 2004-p ingerlanerani nittartakkamik paasissutissiissallutik aallarniinialersaartut. Tamanna soorunami Siumumit pitsaasutut isumaqarfigaarput.
Mannalu iluatsillugu ilisimatitsissutigalugulu oqaatigissavarput tamanna ullumikkut Inatsisartuni Aningaasaqarnermi Ataatsimiititaliap ingerlatereermagu. Tassami Aningaasaqarnermi ataatsimiititaliami oqaluuserineqartuni aalajangiussat 2003-mut 2004-mullu tunngasut tamarmik qarasaasiami nittartakkakkut www.Nanoq.gl-mi qupperarneqarsinnaareernerat ingerlanneqareermat.
Inatsisartut Aningaasaqarnermut Ataatsimiititaliaanut taamaallaat ajornartorsiutaavoq, Naalakkersuisut Aningaasaqarnermut ataatsimiititaliaanut qinnuteqaataat suli ilaatigut Ataatsimiititaliamut anngunneqarsimanngikkaluartut, isummerfigineqarnikuunngitsullu, tusagassiuutikkut Naalakkersuisoqarfimmit saqqummiunneqartarnerat.
Assersuutigalugu savat neqaanut tapiissuteqarnissamut qinnuteqaat 7. aprili Naalakkersuisunit suliarineqartoq aatsaat 21. aprili Aningaasaqarnermut ataatsimiititaliamut angunneqarmat.
Taamaattumik pitsaasumik uppernassuseqartumillu tusagassiisarnissaq Siumumit
pingaartikkatsigu, pissusiviusut aallaavigalugit aalajangiunneqarlutillu isumaqatigiissutaasut siunissami Naalakkersuisut nittartakkamik sulissuteqarnerminnut ilaatillugu ajornartorsiutaasup aaqqiivigineqarnissaa piumasarerusupparput.
Taamatut oqaaseqarluta Siumumit saqqummiunneqartoq akuersaarparput Aningaasaqarnermullu ataatsimiititaliamut ingerlatinneqarnissaa piumasaralutigu.
Ruth Heilmann