Samling
DANSK TEKST MANGLER
Anthon Frederiksen
Upa – 2003/99-01
ulloq, 21. marts 2003
Inuusuttunut aalisarnermik piniarnermillu inuussutissarsiuteqarnissamik kissaateqartunut ilinniartitaanermik pilersitsinissaq suliniutigeqqullugu Naalakkersuisut peqquneqarnissaannik Inatsisartut aalajangiiffigisassaattut siunnersuut.
Inatsisartunut ilaasortap Agathe Fontain-ip siunnersuutaa Kattusseqatigiit sinnerlugit imaattumik oqaaseqarfigissuara:
Ilumummi oqartariaqarpugut ineriartorneq, ullut ukiullu sukkaqalutik ingerlapput unitsinneqarsinnaanatillu, malinnaaniarneq angummanniarneq atuutilersimapput avaqqutiinnarneqarsinnaanatik.
Aalisarnermik piniarnermillu ilinniartitsisut pitsaanersaat, tassalu ataataq ukiuni makkunani aamma saneqqutiinnarneqarsinnaanngikkaluartoq, taamaattoq ineriartorneruk piumasaqaatillu malinnaavigineqartariaqartut pinngitsaalisutullusooq piumaffigiartuinnarpaatigut; aamma aalisartuunermi piniartuunermilu pisussaaffiit anner-tusiartorneranni aningaasarsiornermik, tunisassiat pingaartumik Nunatta avataanut ingerlateqqinneqartartut pillugit annertunerusunik aamma pisisartut tungaanniit piumasaqaateqarfigineqaleraluttuinnartut tusaanngitsuussaaginnarsinnaanngikkivut.
Taamaammat aamma aalisartunut piniartunullu pikkorissartitsinerit, piniariaatsinut aalisariaatsinullu tunngasuunngikkaluartut pillugit ingerlatsisoqartalernissaa avaqqunneqarsinnaajunnaartussaammat tamatuma sillimaffiginissaa aamma piareersimaffigineqartariaqartoq, minnerunngitsumik ukiuni makkunani EU-miit pisussaaffiit piumasaqaatillu annertusiartuinnartillugit.
Taamaattumik pilersaarutit suliniutillu Naalakkersuisut 2004-imiit aallartinnialersaagaat iluatsillugit aalisarnermut tunngasut aamma ilanngunneqarnissaat Kattusseqatigiit sinnerlugit kaammattuutingaakka. Suliniutinullu ilanngullugu aamma KANUKOKA-p ilaatinneqarnissaa aamma inassutigalugu.
Taamatut oqaaseqarlunga suliap aappassaanneerneqannginnerani ataatsimiititaliami susassaqarfiusumi oqaluuserineqarnissaa inassutigaara.