Samling
DANSK TEKST MANGLER
UPA2003-69, 21/3-03
Kalaallit Nunaanni inuit kinaassutsimut uppernarsaammik allagartaqalernissaannik Naalakkersuisut suliniuteqaqqullugit peqquneqarnissaannik inatsisartut aalajangiinissaattut siunnersuut (siullermeerneqarnera).
Demokraatit tungaannit isumaqarpugut Kalaallit Nunaanni aalajangersimasumik najugallit tamarmik ilisarnaammik allagartartaartinneqarnissaannut tunngavilersuut naleqqutinngitsoq, tassa tunngavigineqarmat inuit ilaasa Canadaliartarnissaat. Tassunga innersuussutigissavarput politeeqarfinnut passitaarniarluni qinnuteqartoqartarnissaa.
Siunnersuutip nammineerluni, tassa ilisarnaammik allagartaqalernissap pitsaaqutissai takulluarsinnaavagut, tassa taamaalillutik innuttaasut ataasiakkaat oqilisaassivigineqarsinnaassammata peqatigitillugulu pisortat ingerlatsivii sipaaruteqarnerulersinneqarsinnaammata.
Naalakkersuisulli akissuteqaamminni tikkuarpaat taamaaliornissap pisortat ingerlatsivii aaqqissugaanerallu tamakkerlugit tunngaviusunik piumasaqaateqarfigisussaassagai. Tamanna Demokraatit tungaannit isumaqataaffigaarput. Siunnersuut isumaliutigilluagaarpasinngilaq, tassami aporfissaasinnaasut qulaajaavigineqarluarsimanngillat.
Piffissaq utaqqimaaqqaarusupparput, nunallu ilisarnaatitut allagartanik taaneqartartunik atuiffiulersimasut misilittagaat takoqqaarusullutigik.
Taamatut oqaaseqarluta oqaatigerusupparput siunnersuut tapersersorniarnagu.
Marie Fleischer
Demokraatit