Samling
DANSK TEKST MANGLER
Politik-ikkut suliniaqatigiiffik ATTAVIITTUT KATTUSSEQATIGIIT |
||
Anthon Frederiksen UPA-2003/04-05-06. |
ulloq 11. marts 2003 |
Nunat Avannarliit Killiit piniarnikkut ileqqutoqaasa uppernarsaasersorneqarnerat pillugu Nunat Avannarliit Killiit Siunnersuisoqatigiiffiata aalajangigaata nr. 1/2001-ip Inatsisartunit isumaqatigineqarneranik Inatsisartut aalajangiiffigisassaattut siunnersuut,
aamma
Pisuussutit uumassusillit nungusaataanngitsumik atorneqarnerat pillugu nunat tamat ataatsimeersuartinneqarnissaannik Nunat Avannarliit Killiit Siunnersuisoqatigiiffiata aalajangigaata nr. 2/2001-ip Inatsisartunit isumaqatigineqarneranik Inatsisartut aalajangiiffigisassaattut siunnersuut,
kiisalu
Pinngortitap pisuussutaanik atuineq pillugu suleqatigiissitaliat ataatsimiititaliamik pilersitsisoqarnissaa pillugu Nunat Avannarliit Killiit Siunnersuisoqatigiiffiata aalajangigaata nr. 3/2001-ip Inatsisartunit isumaqatigineqarneranik aalajangiiffigisassaatut siunnersuut.
Aalajangiiffigisassatut siunnersuutit pingasut Nunat Avannarliit Killiit Siunnersuisoqatigiiffiani aamma qinigaaffiup siuliani Kattusseqatigiit sinnerlugit peqataaffigisarneranni suliat ataasiakkaat malinnaaffigalugillu peqataaffigisimasavut tamakiisumik tapersersoratsigit matumuuna erseqqissaatigissuara.
Taamaakkaluartoq immikkoortut ataasiakkaat soorunami aamma Kattusseqatigiit sinnerlugit oqaaseqarfiginngitsoorusunngilakka.
Siullermik piniarnikkut ileqqutoqqat uppernarsaasersorneqarnerat pillugu aalajangiiffigisassatut siunnersuut Kattusseqatigiit sinnerlugit suleqatiginnikkusussuseqarninnik aammalu piniarnermik ileqqutoqqat ilaatigut angumerilaakkavut maanna kingulliarsunik ilaatigulluunniit ilisimaneqarpiarunnaartut, pingaartumik utoqqartatta misigisimasaat eqqaamasaallu atorluarlugit katersorneqarnissaat tamakkiisumik kingusinaannginnitsinni piviusunngortillugillu suleqatigiilluta naammassiniartariaqarpavut.
Tassami Siulittaasup oqarneratuut; atortorissaarutit assigiinngitsut aamma qujanaqalutillu pinngitsoorneqarsinnaanngitsut kalaallit piniariaatsitsinnik taarsiisimapput, qajaq, unaaq, anguigaq nuffit, allallu piniarnermut atortut, periutsit ilami allaat piniarnermi oqaatsit, taggisit assigiinngitsut atorneerupput, aamma taamaappoq illoqarfiit nunaqarfiillu sukkasuumik ineriartortinneqarneranni, illoqarfiit nunaqarfiillu iluini, avataani ilami angallaviit ilaanni taaguutit assigiinngitsut ilaatigut kukkusumik aammalu eqqorpianngitsumi taagorneqartalernerat pinngitsoortinniarlugu tamakku taaguutitoqqat ersarissumik nalunaarsorneqarnissaat qularnanngilaq aamma pisariaqarpoq.
Pisuussutit uumassusillit nungusaataanngitsumik atorneqarnerat pillugu aalajangiiffigisassatut siunnersuut aamma Kattusseqatigiit sinnerlugit tigulluarpara tamakkiisumillu taperserlugu.
Soorlu ilaatigut immikkoortumi nunanut allanut tunngasut pillugit nassuiaammi amma qulequttat pingaartut nunanik allanik Nunatsinnillu isumaqatigiissuteqarfigineqarsimasut Piujuartitsinermik tunngaveqarluni ineriartornermi periusissamut tunngasut, piujuartitsinermi tunngaveqarluni ineriartorneq pillugu Nunarsuaq tamakkerlugu qullersanik ataatsimeersuartitsisimanermi Septembar-imi 2002-imi Afrika-mi kujallermi ingerlanneqartumi eqqartorneqarsimasut innersuussutigalugit Kattusseqatigiit sinnerlugit kaammattuutiginiarpara sinerissap qanittuani ilaatigut piujuaannartitsinissamik an-guniagaqarnermut naapertuutinngitsumik ingerlatsisoqartarnera Naalakkersuisunit aamma pimoorunnerullugu kommuneqarfiit qanimut suleqatigalugit sulissutigineqartuarnissaa kaammattuutigeqqippara.
Tamatumunnga ilanngullugit sinerissami aalisarnermut atortut annaaneqartartut pingaartumik qassutikut, ningittangaarsiutit saattuarniarnermi atortut allallu immap naqqanik mingutitsisut aamma qallorneqarnissaat ilanngullugit Naalakkersuisunut matumuuna Kattusseqatigiit sinnerlugit piumasaqaatingaara.
Naggataatigut pinngortitap pisuussutaanik atuineq pillugu suleqatigissitaliatut pilersitsisoqarnissaa pillugu aalajangiiffigisassatut siunnersuut Kattusseqatigiinniit paasilluarsinnaangaluarlugu taamaattoq Nunat Avannarliit Killiit Siunnersuisoqatigiiffiata saniatigut ataatsimiititaliamik pilersitsinissaq eqqarsarnartoqartippara, minnerunngitsumik Nunatsinni Naalakkersuinikkut anguniakkat ilaannut napertuutinngimmat, tassalu allaffissornermut ingerlatsinermullu aningaasartuuterpassuit ikilisarniarneqarnerannut, taamaattumik Kattusseqatigiit sinnerlugit kaammattuutigissuara; Nunat Avannarlit Killiit Siunnersuisoqatigiiffiata iluani ataatsimiititaliamik pilersitsisoqarnissaa ujartoqqullugu, tassuunaarlugumi ingerlatsinermut aningaasartuuterpassuit sipaarneqarsinnaammata.
Taamatut oqaaseqarlunga siunnersuutit amerlanertigut tunngaviisigut paasilluarlugit taperserpakka.