Samling

Ordførerindlæg(Siumut)-1

DANSK TEKST MANGLER

Partiit oqaaseqaataat(Siumut)-1

                                                              

                                               INATSISARTUNI ILAASORTAATITAT/ LANDSTINGSGRUPPEN

UPA/100

21. marts 2003

Namminersornerullutik Oqartussat qitiusumik allaffeqarfianni utoqqarnut siunnersortimik atorfinitsitsinissamik Naalakkersuisut peqquneqarnissaat pillugu Inatsisartut aalajangiiffigisassaattut siunnersuut.

Namminersornerullutik Oqartussat qitiusumik allaffeqarfianni utoqqarnut siunnersortimik atorfinitsitsinissamik Inatsisartunut aalajangiiffigisassatut siunnersuut Siumumiit imatut oqaaseqarfigissavarput:

Inatsisartunut ilaasortap Enos Lyberth-ip saqqummiussaa Siumup soqutigalugu oqallisigisimavaa.

Siumumiit naalakkersuisut akissutaat akuersaarpalunngitsutut nipeqaraluartoq taamaattoq tapersersornartutut oqaatigineqartut kaammattuutiginiarpagut.

Siumumi ilisimaarivarput siunnersuut taamaattoq aatsaat saqqummiunneqalinngimmat paasilluarsinnaalluguli Inatsisartunut ilaasortap Enos Lyberth-ip taamatut siunnersuuteqarnera. Oqariartuutaani erseqqimmat kommuneni utoqqarnut siunnersortit pitsaanerusumik siunnersuisinnaanerat amigaatigineqartoq, nuna tamakkerlugu ilisimasaasa killeqarnerat tunngavigalugu. Tassanittaaq pineqarpoq susassaqartut iluanni attaveqatigiinniarneq ajornartorsiutaasoq pisortat il.il. suliaminnik suliaqartuarnerat tunngavigalugu.

Oqaatigineqartariaqarporli kommuneni utoqqarnut siunnersuisarneq pitsaanerulissappat Naalakkersuisoqarfiit suli maannamit annertunerusumik kommuneni sulisunik  ilitsersuisarnerat siunnersuisarnerallu akulikinnerusariaqartoq pitsaanerusariaqartorlu ajornanngippat ukiut tamaasa pisarnissaat kissaatiginarluni.

Siullermik oqaatigineqartutut siunnersuuteqartumit naalakkersunillu utoqqarnik sullisineq pitsaanerpaaq tassaavoq, utoqqaat namminneq peqatigiillutik atukkaminnik oqilisaaniarnerat tamanna Siumup pingaarteqaa.

Kommunit utoqqarnut suleqatiginnillutik suliarisaat nukittorsarneqartariaqarput utoqqaat peqatigiiffii suleqatigalugit.

Siumup naalakkersuisunut innersuussutigaa ilaqutariinnermut peqqinnissaqarfimmullu naalakkersuisoq utoqqaat peqatigiiffiata kommunillu suleqatigiinnerat erseqqissumik inatsisartunut nalunaarusioqqullugu.

Siumumiit siunnersuummut taamatut oqaaseqaateqarluta siunnersuut paasilluaraluarlugu, kommunet akisussaaffiisa ataaniittutut isigalugu, kommunellu ataanni atorfinitsitsisimaneq pissusissamisoortutut isigalugu qulaani taaneqartut innersuussutigalugit siunnersuut ilalernartinngilarput.

Doris Jakobsen

Siumut