Samling

Ordførerindlæg(IA)-1

DANSK TEKST MANGLER

Partiit oqaaseqaataat(IA)-1

                        

                                                                                 

                                 UPA 03/100.1

                                 Nuuk, 21.marts 2003

                                 Asii C. Narup/IA

               

               

Namminersornerullutik Oqartussat qitiusumik allaffeqarfianni utoqqarnut siunnersortimik atorfinitsitsinissamik Naalakkersuisut peqquneqarnissaat pillugu Inatsisartut aalajangiiffigisassaattut siunnersuut.

(Inatsisartunut ilaasortaq Enos Lyberth, Siumut)

Siullermeerneqarnera

Inatsisartunut ilaasortap Enos Lyberthip, Siumumeersup, Namminersornerullutik Oqartussat qitiusumik allaffeqarfianni inissisimasumik  utoqqarnut siunnersortimik atorfinititsinissamik siunnersuutaa, Inuit Ataqatigiinnit tamakkiisumik tapersersorparput.

Kommunit arlaqaqisut maanna immikkut utoqqarnut siunnersortinik atorfinitsitsisarput. Tamanna kommunit utoqqarnik kiffartuussinissamik sullissinissamillu pisussaaffeqarnermik kommunit pimoorullugu naammassinninnaanerannut takussutissaasoq Inuit Ataqatigiinni isumaqarpugut.

Qanorluunniit utoqqarnik sullissineq kommuninit akisussaaffigineqartigigaluarpat, tamanna tunngavilersuutaasinnaanngilaq Namminersornerullutik Oqartussani qitiusumik utoqqarnut siunnersortimik atorfinititsisinissamik siunnersuummut itigartitsinissamut.

Enos Lyberthip siunnersuutaa Inuit Ataqatigiinni akuersaarnartuutipparput makku tunngavigalugit:

Ukiuni makkunani utoqqaat pisortanit pilersorneqarnissamut isumassorneqarnissamullu pisariaqartitsisut amerliartorput, taamaalillunilu inoqarfinni ataasiakkaani utoqqarnik sullissinermi misilittakkat annertusiartorlutik. Utoqqarnik qanimut sullissisut taakkuupput ukiuni makkunanerpiaq utoqqartatta kissaataannik, takorluugaannik, pingaartitaannik, ajornartorsiutaannillu annertuumik ilisimasaqartut. 

Tamakkunuunatigut ilisimasat tamarmik iluatinnarput, qitsiumillu tamakkiisumik malinnaaffigineqartariaqarlutillu katersorneqartariaqartut, Inuit Ataqatigiinni isumaqarpugut.

Ilisimasat qitsiusumit katersuuffeqarnissaat pingaaruteqarluinnarpoq. Namminersornerullutik Oqartussat Ilaqutariinnut Pisortaqarfianni utoqqarnut siunnersorteqalernikkut tamanna qulakkeerneqarsinnaavoq, tassuunakkullu utoqqaat silarsuaannut naapertuuttunik Inatsisartut peqqussusiortarnissaat qularnaarneqarsinnaassaaluni.

Maanna Ilaqutariinnut Peqqissutsimullu Naalakkersuisuusoq Ruth Heilmann Enos Lyberthip siunersuutaanut itigartitsimmat Inuit Ataqatigiit tupigusuutiginngitsuunngilarput, pissutigalugu:

1.       Ruth Heilmann Isumaginninnermik Iluarsaaqqinnermut Ataatsimiititaliarsuarmi siulittaasuusimasutut Enos Lyberthip siunnersutaanut assingusumik imaqartumik piviusunngortitsisoqartariaqartoq qasseeriarluni oqaaseqartarmat,

2.       Qinigaaffiup siuliani Inatsisartut Isumaginninnermut Ataatsimiititaliaanni ilaasortatut – ataatsimiititaliami ilaasortat allat aamma peqatigalugit – apeqqut taannarpiaq pingaartillugu oqaluuserisassanngortittarsimammagu.

Siunnersuummik piviusunngortitsinissamut periarfissarissaqalerami akuereqqunagu Inatsisartunut inassuteqarnera tupinnarluinnarpoq.

Siuliani oqaatigeriikkagut tunngavigalugit Inuit Ataqatigiinni siunnersuut tapersersornar-tuutikkipput nalunaarutegeqqissavarput. Siunnersuutillu aappassaaneerneqannginnerani  Ilaqutariinnut Peqqissutsimullu ataatsimiititaliami suliarineqassasoq kissaatigaarput. Naggasiutigalugu oqaatigissavarput siunnersuutip ukiamut aappassaaneerneqarnissaa aamma akuerigatsigu.