Samling
Dansk tekst mangler
INATSISARTUNI ILAASORTAATITAT/ LANDSTINGSGRUPPEN
UPA 2002/16
12.April 2002
Aalisarneq pillugu Inatsisartut inatsisaata allanngortinneqarnissaanut Inatsisartut inatsisissaattut siunnersuut
Siullermeernera
Allannguutissatut siunnersuut manna ilaatigut tunngaveqarpoq Kalaallit Nunaata Kitaani raajanik pisassiisutit tamarmiusut (TAC-p) maannakkut agguaanneqartarnerata allanngortinneqarnissaanik.
Tassalu maannakkut agguaasseriaatsip - sinerissamut qanittumi raajarniutinut 40 %-iusup, avataasiutinut 60 %-mik annertussuseqartup agguaanneqartarnerata allannguuteqarnissaanik. Imaallillugu; - sinerissamut qanittumi aalisartunut 43 %-inngorlugu avataasiortunullu 57 %-inngorlugu agguaassisoqartalissalluni.
Taamatut Naalakkersuisut siunnersuuteqarnerat Siumumiit ilassilluarparput. Tamanna naleqquppoq Inatsisartuni siusinnersukkut oqallinnermi akuersissutigisattinnut tassalu sinerissamut qanittumi raajarniutit akilersinnaasumik ingerlatsisinnaanerannut aqqutsissiuunneqarnissaannik KNAPK-mit kisaatigineqartumut Siumumiit akuersaareersimasatsinnut.
Tamana isumalluarfigaarput malitsigisaanik angallatit akunnattunik angissusillit pisassiisutinik pigisat atorlugit namminneq tunisassiorlutik aningaasarsiornikkut patajaallisarneqarnissaat anguniarlugu suliniuteqarnissamut naapertuummat.
Siumumiit neriuppugut pisassat agguaanneqartarnerannut allannguineq tamanna, aalisartuniit angallatit nutaanngilisut taarsersorneqarnissaannut ilaasalu pisassiisutit kattullugit anginerusunik angallatitaartornissamut aqqutissatut atorluarneqassasoq.
Naggataatigut Inatsisip allannguutissaatut paragrafit allat siunnersuuteqarfiusut aalisarnermi pissutit patajaallisarneqarnerannut attumassuteqarmata taakkua annertunerusumik oqaaseqarfiginagit akuersaarpavut.
Siumumiit taamatut oqaaseqarluta allannguutissatut siunnersuutip aappassaaneerneqannginnerani Inatsisartut Aalisarnermut ataatsimiititaliaannut ingerlateqqinneqassasoq innersuussutigaarput.
Lars Karl Jensen
Siumut