Samling
Dansk tekst mangler*
Anthon Frederiksen Uka- 2004-42-00
|
ulloq, 29. september 2004 |
Aaqqissuussaanermut Isumalioqatigiissitat sulinerat pillugu nassuiaat.
Kattusseqatigiit sinnerlugit imaattumik oqaaseqarfiginiarpara:
Aallarniutigalugu Naalakkersuisut saqqummiinerminni oqaatsit atungaasa ilaat makku isumaqatigilluinnarlugit issuaaffigeqqaassuakka:
”Pisortat ingerlatsivii innuttaasut sapinngisamik pitsaanerpaamik sumilluunniit kiffartuussisariaqartut Naalakkersuisut isumaqarput”.
Tassami Kattusseqatigiinni isumaqarpugut siullertut pingaarnerpaatullu sooq maaniinnerput tamatta eqqaamasariaqaripput; tassa innuttaasut Nunattalu ajunngitsumik sullinneqarnissaat pillugit maani suliniartussaangatta uatsinnut salliutinnataluunniit pingaarnerutinnata.
Taamaattumik Isumalioqatigiisitat maannamuungallartoq sulinerat pillugu nassuiaat amingaateqarsorinarpoq, tassa innuttaasunut aaqqissuussaanerup allanngortiterneqarnissaa qanoq sunniuteqarsinnaanersoq ersarissumik nassuiarneqanngimmat.
Illua-tungaatigulli annerusumik sammineqartoq tassaavoq; kommune-t kattussuunneqassasut immikkoortunut annerusunut imaluunniit nunap immikkoortuinut, apeqqutaatillugit inuussutissarsiornikkut aningaasaqarnikkullu attassisinnaaneq pingaarnertut salliutinneqarnera pingaarnerutinneqartoq malunnarpoq.
Soorunami inuussutissarsiorneq aningaasarsiornerlu assut pingaaruteqarput, kisianni taamaakkaluartoq Kattusseqatigiinniit isumaqarpugut aaqqissuusseqqinneq innuttaasunut qanoq sunniuteqarsinnaanera pingaarnerpaatinneqartariaqartoq, tassa partiit ilaasa amma oqartarnerattut inuk qitiutillugu suliat ingerlanneqartariaqarput.
Tassami inuit ataatsimut eqiterniarneqarnerat imaluunniit kommune-t anginerusunngorlugit kattussuuttinneqarnissat kisimi siunnerfigineqartariaqarsorinanngimmat, kisiannili aamma taamatut iliuuseqarniarneq innuttaasunut qanoq sunniuteqarsinnaanersoq ilanngullugu nalilersuiffigineqarluartariaqartoq isumaqarpugut.
Maanna aningaasaq qitiutillugu suliniuteqarnerit assigiinngitsut aallartinneqartut pillugit oqaatigineqartariaqarpoq; aningaasaannaq eqqarsaatigalugu suliniarnermik oqalunnermik assortuisut isumaannut tamanna naapertuutinngitsumik iliuuseqarniarnertut nalilertariaqarmat, tassami naalakkersuisooqatigiit parti-visa ilaasa aningaasaannaq kisiat tunaartaralugu sulinissamik siunertaqannginnissamik oqaluttarnerannut siunniussat naapertuutinngillat, naak aningaasarsiorneq sullissinerullu pitsanngorsarneqarnissaanut qularnanngitsumik aamma iluaqutaasinnaasunik suliaq ilaqaraluartoq, taamaattoq matumani innuttaasunut sunniutigisinnaasai pillugit misissuinerit aamma ilanngullugit suliarineqarnissaat Kattusseqatigiinniit piumasaqaatingaarput.
Naggataatigut Naalakkersuisunut apeqqutiginiarpara; Isumalioqatigiisitat politik-kikkut malinnaatitaannut, Naalakkersuisut siulittaasuannik aamma ilaasortaaffigineqartumut saaffiginnissutigineqarsimasoq, tassalu kommune-mut qinersinissap ukiunik marlunnik kinguartinneqarsinnaaneranut tunngasoq qanoq isummerfigineqarsimanersoq nassuiaatigineqassasoq, tassa suliami uani pingaarutilimmi aamma tamanna annertuumik kommune-t ilaannut sunniuteqarsinnaammat.
Taamatut oqaaseqarlunga Isumalioqatigiisitat sulilluaqqinnissaannik kissaallugit aappaagumut saqqummiukkumaangaat pissangalluta oqallisigeqqinnissaallu qilanaaralugit utaqqissuagut.