Samling

Dansk tekst mangler*

UKA/143

12.okt.2004

Georg Olsen

 

Kalaallit inuiaqatigiiit ilinniartitaanerisa pitsaassutsikkut amerlassutsikkullu pitsanngortinneqarnissaannik apeqquteqaat aallaavigalugu oqallinnissamik siunnersuut.

(Marie Fleischer aakmma Astrid Fleischer Rex, Demokraatit)

 

 

Aallaqaatigalugu oqaatigerusupparput, aatsaat taama sukumiitigisumik ilinniartitaanerup ullumikkornit pitsaanerusumik iluarsaatuussiffigineqaqqinnissaanut politikimik annertusaaneq aallartisarneqarmat, tamannalu soorunalimi nuannaarutigisariaqarparput.

 

Tarrarsorlunili kingumut qiviarneq ilinniutigisariaqartoq Inuit Ataqatiginnit isumaqarpugut, inuiaqatigiittulli killiffipput kanngusuutigisariaqanngilluinnarpoq, soorlumi Demokraatit killiffipput arlalitsigut kanngusuutigisarialittut naqissuserumagaat, siunnersuutigisamik ilusilersorneqarnerani.

 

Pissusissamisuunngilluinnarpoq inuiaqatigiit iluanni akisussaaqataasimanngitsutut pissusilersorluni inuiaqatigiit imerajunnerarlugit sulilu inerissimanngitsutut naqissuserlugit uparuussinermik nassarlutik ineriartortitseqqittoqartariaqarnerannik saqqummiussineq.

Tamanna toqqammavilersuutigissalugu kusananngimmat.

 

Taamatut naattumik aallarniuteqarluta oqaatigerusupparput, Inuit Ataqatigiinnit tanngassimaarutissatut isigigatsigu maannamut ilinniartitaanikkut ineriartortitseqqikkumalluni annertusaaneq ersarissiartuinnarmat.

 

Inuiaqatigiit amerlassusaat kiisalu ineriartornermi killiffipput eqqarsaatigissagaanni, ukiumut ilinniakkaminnik naammassinnittartut amerliartuinnarsimanerat suli pitsanngortinnerussallugu aqqutissiuussiniartuartariaqarpugut.

 

Eqqaamasariarqarpoq Nunarsuarmi ineriartornerup sukkasoorujussuup killiffiani inuiaqatiginnguatut naalagaaffeqatigiinnerup iluani ikinnerussuteqarluinnarluta suli ulloq manna atoratsigu. 

Taamaammallu silarsuarmioqataanermi ullut ingerlasut naleqqussaajuarnissarmik ukiut tamaasa piumasaqaateqartoq  peqqissaartumik suleqatigiinnikkut ingerlattariaqarparput.

 

Ukiut 25-it ingerlaneranni aqqutissat imaannanngilluinnartut atoriikkagut kanngusuutiginagit ilinniutitut isigisariaqarpavut ingerlariaqqinnissatsinni, aamma ilinniartitaanikkut pissutit eqqarsaatigalugit.

 

Soorunami maannamut ilinniakkaminnik unitsitsiinnartartorpassuit assigiinngitsorpassuarnik pissuteqartut nalilersorluarnerisigut tamatumunnga pitsanngoriaataasariaqartunik tikkuussisariaqarpugut.

 

Illuatugaatigulli Demokraatit siunnersuutaasullu Danskit nunaannut aallarartitsiinnarnissamik eqqarsaasersornerujussuaq pissusissamisuungitsutut isigaarput.

Soorunami pisariaqartuassaaq Nunarsuarmioqatigiit akornanni ilinniartitaanikkut ilinniariartortitsisarnikkullu malinnaajuartarnissarput, tamannalumi ersarissumik pitsanngorsaavigineqartoq Inuit Ataqatigiinnit ilisimalluarparput.

 

Ilinniartoqarfiit imminnut akilersinnaanngitsut matoorlugit, Danmarkimut ilinniariartortitsisalernissamik  Demokraatit siunnersuuteqarnerat ilalernartoqartinngilluinnarparput.

Illuatungaatigullu inerisaaqqinnissarput qanoq isiornikkut pitsanngorsaavigineqarsinnaasoq nalilersortuarumavarput, soorlumi Ilimmarfimmik pilersitseqataarusulluta piumassuseqartugut.

 

Tamassuma ilaatigut nassatariumaarpaa nutaamik ilinniarfinnik katiterinikkut ataqatigiissaarisinnaanermut periarfissat ammaanneqarnerannik.

 

Nunarput aallunniartigu ineriartortikkumallugu, oqaluinnarata nunarput imminut akilersinnaanngitsuusoq. Illuatungaatigullu naleqqussaanermik suli annertusigaluttuinnartitsinissarput aatsaat taama pisariaqartitsigaarput.

 

Ukiunut atoriikkatsinnut qiviarsinnaagutta nalilersuillutalu, ukiunut tulliuttut siunniussaqarnissarput sukatissallutigu tunngavissagissaarpoq, taamaammat ilinniartunut ilinniarfeqarfinnut nunattalu aaqqissussaaneranut naapertuuttumik iliuuseqarnissarput pingaaruteqarluinnarpoq.

   

Inuiaqatigiit akornatsinni immitsinnut piumaffigeqartigiinnissarput Naalakkersuinikkut siulersorneqartariaqarpoq, taamaammallu nukittuumik iliuuseqarnissaq suleqatigiissutigisariaqaripput Inuit ataqatigiinnit isumaqarluinnarpugut.

 

Inuiaqatigiit amerlassuserput eqqarsaatigalugu tamanut naleqqunnerpaamik iliuuseqarnissaq pisariaqarpoq, inuiattulli sumi inissisimanerput puigornagu.

Qujanaq