Samling

Dansk tekst mangler

LANDSTINGSGRUPPEN

UKA2003/159

Pinngortitamik illersuineq pillugu Inatsisartut inatsisissaattut siunnersuut.

(Ineqarnermut, Attaveqarnermut Avatangiisinullu Naalakkersuisoq, Mikael Petersen)

(Siullermeerineq)

Pinngortitamik illersuineq pillugu Inatsisartut inatsisissaattut siunnersuut saqqummiunneqartoq pillugu Siumumiit imatut oqaaseqarfigissavarput.

Paragrafit ataasiakkaat immikkoortullu atasiakkaat annerusumik oqaaseqarfiginngikkaluarlugit siunnersuut Siumumiit ataatsimoortumik oqaaseqarfigissavarput.

Siumumiit sulissutigaarput avatangiisit minguitsunissaat piujuartitsinissarlu. Avatangiisit isumalluutillu uumassusillit paarilluarnissaat. Isumalluutit uumassusillit uumaatsullu atorneqarneraani avatangiisit sapinngisamik pitsaanerpaamik minarineqarnissaat.

Siumup sulissutigiuarpaa pinngortitap illersorneqarnissaa nalunnginnamiuk issittumi avatangiisit mianernaqisut illersortuartariaqartullu.

Nunarput pillugu pinngortitallu illersorneqartuarnissaa pillugu tamatta akisussaaqatigiippugut, kinguaassavut aamma taamatut nuannersumik inuuffeqarnissaat qulakkeersinnaaqqullugu.

Taamaattumik Siumumiit pingaarteqaarput nunatta allanngorartuartup aamma silaannaap klimap allanngorarnera pillugu uumasuinut inuinullu sunniutigisartagai pillugit ilisimasaqarnitta ullumikkornit suli annerusumik aallunneqarnissaa, Tamanna ilisimatusarnikkut ingerlanneqarnera Siumumiit malittariniarlugu suliniutaasut aningaasaliisarnerillu eqqumaffigineqarnissaat Naalakkersuisunut matumuunakkut kaammattuutigeqqaarniarparput.

Uumasut pisarineqartartut inuussutissartasa imaluunniit isertitsissutissartaasa tamakkiinerpaamik iluaqutigineqarsinnaanerisa qulakkeerniarnissaat ullumikkornit pikkoriffiginerusariaqarparput.

Killilersuisoqassatillugu piniarnermik inuutissarsiuuteqartut umiatsiaararsortullu annertuumik eqqugaasinnaasarnerat eqqarsaatigalugu, taamatut piniarnerinnarmik inuuniuteqarnerup ingerlanerani ukiup kaajallakkiartornerani nunap immikkoortuini uumasut assigiinngitsut aningaasarsiutaanerata qulaajarlugu ilisimasaqarfigilluarnissaa Naalakkersuisunut kaammattuutigerusupparput, killilersuisoqassatillugu piniartukkormiut eqqugapilunginnissaat eqqarsaatigalugu.

Pinngortitamik atuineq pillugu inatsit 1980-imeersoq ukiut 20-it sinnerlugit atuutereersoq pissutsinut ullutsinni atuuttunut naleqqukkunnaarluinnartoq taarserlugu inatsisartut inatsisisaattut siunnersuut suliarilluagaasoq imartoorlu Ineqarnermut Attaveqarnermut Avatangiisinullu Naalakkersuisumit saqqummiunneqartoq ineriartortinnerani peqataasimagatta oqartariaqarpugut.

Siumumiit isumaqarpugut suliaq sukumiisumik pipallataanngitsumillu suliarineqarsimasoq pinngortitamut avatangiisinullu illersuineq pillugu inatsisissap susassaqartunut tamanut naammaginartumik ilusilerneqarnissaa aammalu ilusileeqataaffigineqarnissaa anguniarneqarsimammat.

Pinngortitamik illersuineq pillugu inatsit atortuulersussaq toqqaannartumik aningaasatigut naleqassanngitsoq Naalakkersuisup saqqummiussaa Siumumiit isumaqatigigaluarlutigu eqqarsarnartoqartipparput, ilimagigatigu peqqussutit atuutilersussat inatsimmit aallaaveqartut aningaasartorfiusinnaanerat.

Taamatut naatsumik Siumumiit oqaaseqarluta Inatsisissatut siunnersuut ataatsimiititalianut susassaqartunut nalilersorluarneqarluni sulianeqarnissaa inassutigaarput.

 

Jens NapãtôK`

Siumut