Samling
Dansk tekst mangler
UKA 2003/86
20. november 2003
Vilhelm Christiansen
Qanngaaniilli inuussutissarsiutaasunik ingerlatsisut, tassunga ilanngullugu inuussutissarsiutigalugu piniartut umiatsiaararsortullu aalisartut, pisortanit aningaasalersorneqartumik akissarsianut tapiiffigineqarnissamik pisariaqartitsinerannik misissuineqartariaqarnersoq pillugu apeqquteqaat aallaavigalugu oqallinnissamik siunnersuut, taamaaliornikkut isertitanik misissuinermik tunngaveqarluni inuussutissarsiortut taakku pisortatigoortumik akissarsiat minnerpaaffigisaasa annertoqataannik inuussutissaqarnersut paasineqarsinnaaqqullugu.
(Inatsisartunut ilaasortaq Aqqalukasik Kanuthsen, Inuit Ataqatigiit)
Piniarnermik inuussutissarsiuteqarnerup ukiorpassuarni avataaniik unammillerneqarnermik annertuumik nalaataqarsimanera tamanna ilumoorluinnarpoq. Ammalu ukiuni kingullerni issilerumaataartarnerata kingunerisaanik piniartut piniarniarnerminni periarfissalutsinneqartarsimapput silaannaap allangornerata kingunerisaanik.
Inuit Ataqatigiit isumaqarpugut inuussutissarsiutip kinguaariippassuarni inuiaqatigiit nappatigisarsimasarput aamma inooriaatsitsinnut piorsarsimatsuttillu pingaaruteqaqisup nungutaajartornera Inatsisartunit isiginngitsuusaarneqarsinnaanngitsoq. Inuiaqatigiit piniartut ameerutaannut tapiissutaat ukiumut 2003-mut 30 mio.kr. naleqarnerarneqarpoq.
Inuit Ataqatigiinniik oqarumavugut inuussutissarsiummut tapiissutitut piunnaarlugit inuussutissarsiummut ingerlatsinermullu aningaasaliissutaasutitut taaneqartassasut, manna pillugu: kalaallit nunatsinni inuppassuarnik suliffissaqatitsinermut aningaasat atorneqartarput, qangaaniimmi maannamut puisinit amerniarneq ingerlanneqarmat.
Ullumikkut immakkut inuussutissarsiortut arlariiaat taasinnaavagut: Piniartut aalisartullu umiatsisarsortut, pujortuleerarsortut, raajarniutini mikinerni ingerlatsisut kiisalu kilisaatersortut
Soorunami sunulluunniit nunap karsianik aningaasaliissangaani sumut tungatinnerlugu paaseqqaartariaqartarpoq, qujanarporlu pineqartut atungaannut misissuisitsineq siulleq aappaangumut Maj-imut saqqummersinniarneqarmat, tamannalu pingaaruteqarluinnassaaq.
Piniartut atungaat pillugit ukiorpangorsimasuni kinguartiteraluni ullumimmut iluarsiisimanginnerup kingunerisaanik pisariaqartittineq aningaasarpassuarnik naleqalersimammat ukiorpanni piniartut ataatsimeersuartarnerini piniartut saqqummiuttangaat
timitalersussallugit Inuit Ataqatigiinniik piumassuseqarnerput matumuuna nalunaarutigissavarput.