Samling
Dansk tekst mangler
UKA 2003/148
19.november-2003
„Immikkut aningaasarsiornikkut killeqarfiit pillugit inatsisip aamma Kalaallit nunaata eqqaani immani oqartussaaffiit killilerneqarnerat pillugu kunngip peqqussutaata allanngortinnera pillugu Namminersornerullutik Oqartussat oqaaseqaataat” pillugu aalajangiiffigisassatut siunnersuut.
(Aningaasanut Nunanallu Allanut Naalakkersuisoq)
Aningaasarsiornikkut imartat pillugit inatsisissatut siunnersuut pillugu siumut-miit imaattumik oqaaseqaateqassaagut.
Naalakkersuisup saqqummiussinermini oqaatigaa inatsit nr. 411 2.maj 1996-meersoq 1.juli 1996 Danmarkimi atuuttuulersoq Nunatsinnut kiisalu Savalimmiunut atuussimanngitsoq.
Inatsisissap Inatsisartuni akuerineqararuni kingunerisassaai Naalakkersuisup saqqummiussinermini eqqaassaai Siumut-miit tamakkiisumik taperserpagut.
Ilaatigut 200 sømilinik killeqarfiup iluani misissuisinnaanermi immami sarfanik, kiisalu anorimik iluaquteqarsinnaanerit inatsimmi Nunatsinnut iluaqutaalertussatut oqaatigineqarput.
Aammattaaq Siumut-miit maluginiarparput susassaqartunut tamanut pissusissaq eqqorlugu tusarniaassutigineqarsimasoq, tamanna Siumut-miit assut iluarisimaarparput.
Pingaartillugulu oqaatigiumavarput inuutissarsiortunuttaaq tusarniaassutigineqarsimanera, isumaqaratta taakkua saneqqunneqarsinnaanngitsut inuutissarsiornerup iluani attuisinnaasutigut tusarniarneqartussanut sallernut ilaatinneqarsimanerat iluarisimaarparput.
Naggataagut Naalakkersuisup saqqummiussinermi oqaatigisaai Nunarsuaq tamakkerlugu imaatigut inatsiseqarnerup nukittorsarnissaanik siunertaqarneq Siumut-miit tapersersorluinnarparput.
Nunatta namminersortuunissaanik anguniagaqarnermut tamanna naapertuuttutut isigigatigu.
Naggataagut Siumumiit Inatsisissatut saqqummiunneqartoq akuerseqataaffigissagatigu oqaatigalutigu, aappassaaneerneqartinnani Inatsisit atortinneqarnerannut ataatsimiititaliamut ingerlatsinneqarnissaa innersuussutigaarput.
Isak Davidsen
Siumut