Samling
| Anthon Frederiksen UKA-2003-148-01 | ulloq, 19. november 2003 |
Dansk tekst mangler
| Anthon Frederiksen UKA-2003-148-01 |
ulloq, 19. november 2003 |
Aningaasarsiornikkut killeqarfiit nammineq oqartussaaffigisat pillugit inatsisip aamma Kalaallit Nunaata imartaata killilerneqarnera pillugu Kunngip peqqussutaata allanngortinneqarneranik peqqussutip Kalaallit Nunaannut atuutilersinneqarnissaat pillugit namminersornerullutik Oqartussat oqaaseqaataat pillugu Inatsisartut aalajangiiffigisassaattut siunnersuut.
Kalaallit Nunatta eqqaani aningaasarsiornikkut killeqarfeqalernissap pillugu aamma Kalaallit Nunatta eqqaani titarnerit tunngaviusut iluarsaateqqinnissaat pillugu Danmark-imi Nunanut allanut minister-eqarfiup nunatsinni Namminersornerullutik Oqartussat allakkatigut 22. august 1997-imeersutigut qinnuigisimavat; inatsit nr. 411, 22. maj 1996-imeersoq aningaasarsiornikkut imartat, aalajangersakkanik § 5-imi taaneqarsimasunik imaqartoq, kunngip peqqussutaatigut Kalaallit Nunatsinnut atortussanngortinneqassasoq.
Tamatuma kingunerisaanik Suleqatigiisitanik Kalallit Nunatsinneersunik Danmark-imeersunillu pilersitsisoqarpoq assigiinngitsuniit peqataaffigineqartunik.
Suliat killeqarfiit titarnerinut tunngasuuteqartut assigiinngitsut Kalaallit Nunatsinnut aningaasarsiornikkut pingaaruteqartut annerusunik oqaaseqarfiginagit - suliassamik suleqatigiisitap titarnernut tunngaviusunut ataasiakkaanut oqaaseqaataani qeqertaq Nunatta kangiani - Grønlandshave-imi 79-fjorden-p kangiani 1993-imi nassaarineqartoq, kingornalu 1999-imi Nunap assinganu ilanngunneqartup Nunatta aningaasarsiornermut qanoq pingaaruteqartigisinnaanera pillugu Naalakkersuisut paatsuungananngitsumik itinerusumillu nassuiaateqarsinnaappata qujanassangaluarpoq, tassami nassuiaatini ilaatigut aamma oqaatigineqarpoq 2001-imi Tobias Ø misissuiffigineqarsimasoq, kisiannili suili tamakkiisumik uuttortaasoqarsimanngitsoq aammalu suli nunap assiganut ilanngunneqarsimanngitsoq, naak siuliani oqaatigineqaraluartoq Tobias Ø nunap assiganut ilanngunneqareertoq.
Immikkoortup tullianut oqaaseqaatissakka aamma uani oqaaseqaatigisannut tunngaviatigut allaaneruvallaanngimmata innersuussutigiinnassuakka.