Samling
Dansk tekst mangler
UKA 2002/81-1
14. oktober 2002
Namminersornerullutik Oqartussat allafeqarfiisa ataatsimuulersinneqarnissaat siunertaralugu Inatsisartut ataatsimiittarfissaannik allaffeqarfimmillu nutaamik sanaartornissap pilersaarusiornissaannik, matumanittaaq AIS 2003-mi konto pingaarneq 01.10.10-p, Namminersornerullutik Oqartussat Nuummi allaffissuata allilerneqarnissaanut inatsisartullu ataatsimiittarfissaata sananeqarnissaata pilersaarusiornissaasa piareersarneqarnissaanut aningaasalersuinissaq siunertaralugu, 3.500.000,-kr.-inik qaffaavigineqarnissaanik aalajangiiffigisassatut siunnersuut.
Siullermeernera
Siumumiit aallaqqaammut oqaatigissavarput siunnersuut una maanna suliarineqartoq inatsisartuni ilaasortap Simon Olsen-ip, Siumut, siunnersuutaanut Siumumiillu isumaqatigilluakkatsinnut qaneqimmat suliassaat taakku ataatsimoortillugit Siumumiit imaattumik oqaaseqarfigissavagut.
Siumumiit iluarisimaarparput maannakkut allaffissuarmik atuinermi ungasinnerusukkullu atuinikkut ajornartorsiutinik qaangiiumalluni aaqqiissutaasinnaasunik misissueqqissaarnissamik suliaqartoqalereermat. Nalunngilarpummi atuinikkut ajornartorsiutit maannakkut erseqqilluinnartut Inatsisartut Naalakkersuisullu allaffeqarfiini atugaalereersimasut.
Pisariaqartitanik aaqqiissutaasinaasunillu misissuisimanermi allaffeqarfiit ataatsimuulersinnerisigut sulinermi pisariillisaanermi iluanaaruteqarnissamik piffissamillu ungasinnerusumi aningaasaqarnikkut sipaaruteqartoqarnissamik aamma tikkuaassisoqarpoq. Siumumiillu tikkuaanerit taakku isumaqatigaagut.
Misissuinermi aningaasaqarnikkut naatsorsukkani naatsorsuutigineqarpoq Namminersornerullutik Oqartussat assigiinngitsuni Nuummi attartornera unitsinneqassasoq. Aammattaaq Namminersornerullutik Oqartussat illuutaasa assigiinngitsut ataatsimut allaffeqarfeqalernissamut kissaateqarnermut attuumassuteqarunnaartut tunineqarnissaat naatsorsuutigineqarluni. Taamatut siunertaqarnermut Siumut isumaqataavoq. Attartukkat taakku illullu siunertanut allanut atorneqarnissaannut qularutissaanngitsumik periarfissaqalissaaq.
Siumumiit aammattaaq pilersaarutip akuersaarneqarnissaanut peqataassaagut, taamaalilluni sanaartugassatut eqqarsaatigineqartup pilersaarusiorfigeqqinnera piaartumik aallartisarsinnaaqqullugu. Tamatumalu kingorna sanaartortitsilernissamut inaarutaasumik aalajangiinissaq anguniarlugu pilersaarutip ingerlateqqinnissaanut Inatsisartunut nalunaarusiassaq maannamiit qilanaarluta utaqqilereerparput.
2003-mi aningaasanut inatsisissamut kontomi pingaarnermi 01.10.10 sanaartugassap pilersaarusiornissaata aningaasaliissutissanik 3.500.000,00 kr.-inik aningaasaliisoqarnissaanut nalunaaruteqartoqarnissaa taamaalilluta Siumumiit taperserparput.
Siumumiit taamatut oqaaseqarluta siunnersuut tamakkiisumik taperserparput, suliallu aappassaaniinnginnerani Aningaasaqarnermut Ataatsimiititaliami suliarineqarnissaa inassutigissallugu.
Anders Andreassen
Siumut